Drejtoria Rajonale e Inspektoratit Kombëtar për Mbrojtjen e Territorit, Qarku Shkodër, ka marrë masa për garantimin e zbatimit të vendimit të Këshillit të Ministrave për pezullimin e punimeve të ndërtimit dhe aktiviteteve të lidhura me to në zonat turistike gjatë sezonit turistik 2026. Në kuadër të kontrolleve në terren, IKMT ka konstatuar vijimin e punimeve në kantierin e identifikuar si “Rozafa Tower”, në qytetin e Shkodrës. Pas inspektimit, është vlerësuar se faza aktuale e punimeve, nëse ndërpritet pa u kryer ndërhyrja e nevojshme, mund të krijojë rrezik për rrëshqitjen e gropës së hapur në kantier. Për këtë arsye, IKMT ka autorizuar vijimin e kufizuar të punimeve për një periudhë dyditore, në orare të përshtatshme, me qëllim minimizimin e ndikimit në zonën përreth dhe eliminimin e rrezikut.
Gjatë këtyre dy ditëve, punimet do të jenë nën monitorimin e IKMT-së dhe do të kufizohen vetëm në ndërhyrjet e domosdoshme për stabilizimin dhe sigurimin e gropës së ndërtimit. Pas përfundimit të ndërhyrjeve të nevojshme për stabilizimin e zonës, çdo punim i mëtejshëm në objekt do të ndërpritet, në respektim të përcaktimeve në fuqi për pezullimin e punimeve gjatë sezonit turistik. IKMT Shkodër thekson se masat janë marrë në kuadër të zbatimit rigoroz të vendimit të Këshillit të Ministrave dhe në vijim të angazhimit të Bashkisë Shkodër për respektimin e tij në territorin e bashkisë.
Njoftimi:
