Në historinë e artit shqiptar, emri i Mjeshtrit të Madh Sandër Ruçi mbetet një nga figurat e spikatura të humorit, satirës dhe teatrit të varietetit. Me një karrierë të pasur që shtrihet në disa dekada dhe me një krijimtari të jashtëzakonshme, ai vazhdon të jetë një simbol i skenës shqiptare dhe një krenari e Shkodrës.
I lindur më 19 korrik 1955, Sandër Ruçi e nisi rrugëtimin artistik që në moshë të re, fillimisht me trupat amatore dhe më pas në Teatrin e Varietesë së Shkodrës. Me interpretimet e tij të veçanta, humorin inteligjent dhe satirën plot finesë, ai fitoi zemrat e publikut, duke u bërë një nga artistët më të dashur të vendit. Përgjatë karrierës së tij, ai ka realizuar një krijimtari mbresëlënëse: 16 recitale, mbi 500 role, 17 librete, 23 emisione podcast, 248 shkrime humoristike, 2 libra artistikë, dhjetëra Sofra Shkodrane dhe 93 premiera të interpretuara përkrah korifejve të artit të Varietesë Shkodrane. Një bilanc që dëshmon përkushtimin dhe pasionin e tij të pandërprerë ndaj artit. Krahas interpretimit në skenë, Sandër Ruçi ka spikatur edhe si autor. Libri i tij “Kur të buzëqesh vargu”, është një dëshmi e aftësisë së tij për të ndërthurur humorin, satirën dhe reflektimin shoqëror në letërsi. Edhe pse prej vitit 2006 jeton në Florida, SHBA, ai nuk e ka shkëputur kurrë lidhjen me vendlindjen. Përmes aktiviteteve kulturore, programeve televizive dhe platformave të tij në YouTube e Facebook, ai vazhdon të promovojë artin shqiptar dhe të mbajë gjallë frymën e humorit shkodran. Me titullin e merituar “Mjeshtër i Madh”, Sandër Ruçi mbetet një ikonë e gjallë e artit skenik shqiptar. Vepra dhe kontributi i tij janë një pasuri kombëtare, ndërsa batutat, personazhet dhe krijimtaria e tij vazhdojnë të sjellin buzëqeshje te publiku, duke dëshmuar se arti i vërtetë nuk njeh kohë, moshë apo kufij. Gëzuar 71-vjetorin, Mjeshtër i Madh Sandër Ruçi! Newspower.al i uron artistit, jetë të gjatë dhe frymëzim të pandërprerë, që të vazhdojë të na dhurojë buzëqeshje dhe vlera artistike.
