Në kuadër të vizitës së tij në Pukë, drejtori i Operatorit të Shërbimeve të Kujdesit Shëndetësor, Rajoni i Veriut, Edmond Ndou, zhvilloi një sërë ndalesash inspektuese në Njësinë Vendore të Kujdesit Shëndetësor Pukë dhe në Qendrat Shëndetësore Puke – Rrapë. Gjatë vizitës në këto struktura shëndetësore, Ndou u njoh nga afër me kushtet e punës, ambientet dhe organizimin e shërbimit shëndetësor, duke ndjekur nga afër funksionimin e strukturave që ofrojnë kujdes shëndetësor për banorët e kësaj zone. Një vëmendje e veçantë gjatë takimeve iu kushtua përgatitjes së personelit shëndetësor për përballimin e sfidave që sjell stina e dimrit. Duke qenë se Puka dhe zonat përreth karakterizohen nga kushte të vështira atmosferike gjatë muajve të ftohtë, të cilat mund të ndikojnë edhe në aksesin e qytetarëve drejt shërbimeve shëndetësore, Ndou kërkoi angazhim dhe përgjegjësi të shtuar nga i gjithë personeli. Ai theksoi domosdoshmërinë e mbajtjes së strukturave shëndetësore në gatishmëri maksimale, në mënyrë që çdo qytetar të marrë shërbimin e nevojshëm në kohë dhe me përkushtimin e duhur. “Qytetari duhet të jetë gjithmonë në qendër të vëmendjes dhe ofrimi i shërbimit shëndetësor duhet të garantohet pa ndërprerje, edhe në kushtet e vështirësive që mund të sjellë dimri shtoi Ndou”. Në këtë drejtim, kërkohet një koordinim më i mirë i punës, gatishmëri e vazhdueshme e personelit dhe vlerësim në kohë i nevojave të komunitetit, veçanërisht në zonat ku kushtet atmosferike mund të krijojnë vështirësi në lëvizje dhe në marrjen e shërbimeve shëndetësore. Njesia vendore e kujdesit shendetesor Pukë është institucioni përgjegjës për organizimin dhe administrimin e shërbimit shëndetësor parësor në territorin e Pukës dhe Fushë-Arrëzit, duke luajtur një rol të rëndësishëm në garantimin e kujdesit shëndetësor për banorët e këtyre zonave. Vizitat inspektuese në strukturat shëndetësore synojnë ndjekjen nga afër të funksionimit të tyre, si dhe rritjen e përgjegjshmërisë dhe cilësisë së shërbimit ndaj qytetarëve, me një vëmendje të posaçme në prag të sezonit të dimrit.
