Një shtetas është proceduar penalisht në Shkodër për veprën penale “Ushtrimi i ndikimit të paligjshëm ndaj personave që ushtrojnë funksione publike”, pasi dyshohet se ka tentuar t’u japë para punonjësve të Policisë Rrugore.
Ngjarja ka ndodhur në “Sheshin Balshaj”, ku shërbimet e Policisë Rrugore kanë ndaluar për kontroll një kamion të ngarkuar me inerte. Mjeti po qarkullonte pa mbulesë në karroceri, në kundërshtim me rregullat e përcaktuara për transportin e inerteve.
Sipas Policisë, në momentin që drejtuesi i mjetit u ka dorëzuar efektivëve dokumentet e kamionit, brenda tyre është konstatuar një kartëmonedhë me vlerë 5 mijë lekë të rinj.
Për këtë rast, drejtuesi i mjetit është proceduar penalisht për veprën penale të ushtrimit të ndikimit të paligjshëm ndaj personave që ushtrojnë funksione publike, ndërsa materialet i janë referuar Prokurorisë për veprime të mëtejshme.
