Shkodër/Finalizohet operacioni policor i koduar “Recently”; zbardhen disa raste vjedhjeje.
Kapet dhe vihet në pranga autori i dyshuar.
Sekuestrohen një sasi lënde narkotike, e gjetur në banesën e tij, si dhe 2 motomjete të dyshuara të vjedhura.
Shërbimet e Komisariatit të Policisë Shkodër, si rezultat i veprimeve hetimore për zbardhjen e rasteve të vjedhjes, identifikimin dhe kapjen e autorëve, finalizuan operacionin policor të koduar “Recently”, gjatë të cilit u kap dhe u vu në pranga shtetasi:
– Xhuljan Rrethaj 20 vjeç, banues në fshatin Grudë e Re, Shkodër.
Nga veprimet hetimore dyshohet se 20-vjeçari, në bashkëpunim me një shtetas të mitur, në periudha të ndryshme, në qytetin e Shkodrës dhe në Velipojë, ka kryer disa raste vjedhjeje, konkretisht motomjete, një biçikletë elektrike, një celular dhe një shumë parash në një lokal.
Motomjetet janë gjetur dhe sekuestruar në cilësinë e provës materiale.
Gjatë kontrollit në banesën e 20-vjeçarit, shërbimet e Policisë gjetën dhe sekuestruan, në cilësinë e provës materiale, një sasi lënde të dyshuar narkotike Cannabis sativa.
Vijojnë hetimet për zbardhjen e vjedhjeve të tjera që mund të ketë kryer i arrestuari.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
