Në ambientet e Provincës Françeskane “Zoja Nunciatë” në Shkodër u zhvillua ceremonia promovuese e librit më të ri me poezi të At Pashko Gojçajt, me titull “Kohë në Shtjellë”. Aktiviteti mblodhi klerikë, studiues, artdashës dhe miq të autorit, të cilët u njohën me krijimtarinë më të fundit poetike të meshtarit nga Malësia e Tuzit. Gjatë promovimit, u theksua se libri përmbledh vargje që ndërthurin përvojën shpirtërore me reflektime të thella mbi kohën, njeriun dhe sfidat e jetës, duke ruajtur një stil të thjeshtë e të përjetshëm, të njohur tashmë në veprat e tij të mëparshme.
Pjesëmarrësit vlerësuan kontributin e At Pashko Gojçajt në kulturën dhe letërsinë shqipe, si dhe veprimtarinë e tij të pandërprerë në shërbim të komunitetit. Pedagogu Vincens Marku i bëri një analizë të detajuar poezisë: “Shkodra ka”. Vetë autori u shpreh i emocionuar për vlerësimet dhe u ndal tek puna e gjatë deri kur këto poezi panë dritën e botimit.
At Pashko Gojçaj ka lindur në Malësi dhe prej më shumë se katër dekadash shërben si meshtar i Urdhrit Françeskan. Ka ushtruar detyra të rëndësishme kishtare, mes të cilave famullitar në Kojë dhe Tuz, Guardian i Kuvendit Françeskan në Tuz, si dhe Vikar i Përgjithshëm i Argjipeshkvisë së Tivarit. Prej vitit 2020 ai shërben si Provincial i Provincës “Zoja Nunciatë” në Shqipëri dhe Mal të Zi. Përveç veprës së re “Kohë në Shtjellë”, At Pashko Gojçaj është autor i disa botimeve letrare dhe shpirtërore, ndër to: “Kompanjelat dhe hijet”, “Sytë e Shënjteshës I & II”, “Zâni i Zanit”, “Takimi i kohëve” dhe “Foto Albumi”. Krijimtaria e tij është vlerësuar me çmime kombëtare dhe mirënjohje për kontributin kulturor dhe humanitar.
