Deputetja e pavarur Marjana Koçeku, deputeti i Partisë Mundësia, Erald Kapri, dhe nënkryetari i Partisë Demokratike, Nikola Kedhi, zhvilluan sot një takim në ambasadën amerikane me zyrtarë të lartë të mbërritur nga Uashingtoni.
Përzgjedhja e tre përfaqësuesve të rinj të opozitës për këtë takim duket se nuk është e rastësishme. Sipas burimeve, në qendër të diskutimeve ka qenë situata politike në Shqipëri, klima e tensionuar dhe pakënaqësia në rritje e qytetarëve, e cila është reflektuar edhe në protestat e zhvilluara së fundmi.
Secili prej tyre ka spikatur në mënyrën e vet në zhvillimet e fundit politike. Marjana Koçeku ka zhvilluar kontakte të shumta me përfaqësues të trupit diplomatik dhe ka tërhequr vëmendjen e mediave të rëndësishme ndërkombëtare, ku ka folur për problematikat politike në Shqipëri dhe protestën qytetare. Ndërsa Erald Kapri është pozicionuar ndër zërat e rinj më aktivë në Kuvend, duke shprehur mbështetje për protestën dhe kauzat e saj. Në të njëjtën linjë të angazhimit politik, Nikola Kedhi është një prej figurave të reja aktive brenda Partisë Demokratike.
Takimi zhvillohet në një moment delikat për politikën shqiptare. Qeveria ndodhet nën presionin e zhvillimeve në sistemin e drejtësisë, ndërsa ish-funksionarë dhe zyrtarë të lartë të lidhur me qeverisjen socialiste janë përballur me akuza për korrupsion. Në këtë klimë, Asambleja Kombëtare e Partisë Socialiste, e parashikuar të mbahet këtë të shtunë, pritet të sjellë ndryshime në strukturat drejtuese. Mbetet për t’u parë nëse këto lëvizje do të përkthehen në një reflektim real politik apo do të mbeten thjesht një përpjekje për të zbutur pakënaqësinë e krijuar në opinionin publik.
Paralelisht, protesta e studentëve vijon, ndërsa kërkesat për dialog të artikuluara nga kryeministri nuk kanë marrë deri më tani përgjigjen e pritur prej tyre.
Në këtë kontekst, takimi i tre përfaqësuesve të rinj të opozitës me zyrtarë amerikanë të ardhur posaçërisht nga Uashingtoni merr një peshë të veçantë politike. Përtej përmbajtjes së diskutimeve, vëmendje tërheq edhe mesazhi që mund të përcjellë ky kontakt diplomatik, në një periudhë kur zhvillimet e brendshme politike në Shqipëri po ndiqen me interes të shtuar.
