Shkodra përkujtoi 33 vjetorin e masakrës së 2 Prillit 1991, ku mbeten të vrarë 4 dëshmorët e demokracisë Arben Broci, Bujar Bishanaku, Nazmi Kryeziu dhe Besnik Ceka, si dhe u plagosën mbi 100 të tjerë. Familjarë, qytetarë të Shkodrës dhe përfaqësues të partisë demokratike vendosen kurora me lule dhe kryen homazhe në memorialin kushtuar kësaj ngjarje. Për herë të parë në një ceremoni të organizuar nga grupimi i Berishës u pa të shfaqet edhe deputetja Jorida Tabaku, ndonëse e distancuar nga Flamur Noka apo Gazmend Bardhi. Në pamundësi për të qënë fizikisht për shkak të arrestit shtëpiak, Sali Berisha në cilësinë e kreut të Partisë Demokratike, e dha mesazhin e tij përmes një video të regjistruar më herët nga banesa e tij. Për herë të parë pas 33 vitesh demokratët tha Berisha e përkujtojnë këtë ngjarje me kokën ulur, duke ju referuar asaj që ndodhi në këtë qytet në zgjedhjet vendore, ku humbën drejtimin e bashkisë.
Fjala e Berishes / Mirëdita dhe përshëndetje të përzemërta. Së pari, duhet të përshëndes dhe të përulem me mirënjohje para familjarëve të martirëve të 2 prillit, të pranishëm në këtë ceremoni.Të përshëndes demokratet dhe demokratët e Shkodrës, qytetaret dhe qytetarët e këtij qyteti dhe mbarë shqiptarët.Ne sot nderojmë veprën e pavdekshme të martirëve të votës së lirë, bijve të Shkodrës, Arben Broci, Bujar Bishanaku, Nazmir Kryeziu dhe Besmir Ceka që ranë për t’u bërë të pavdekshëm në një protestë kundër grabitjes së votës nga diktatori i fundit komunist, Ramiz Alia dhe klika e tij.Protestuesit paqësorë rrethuan atë ditë, më 2 prill të vitit 1991, ndërtesën e partisë së krimit, të bindur se ajo ishte projektuesja, organizatorja dhe ekzekutuesja e aktit të vjedhjes së votës dhe zgjedhjeve.Por, protestës së tyre paqësore, diktatori Ramiz Alia dhe falangat e tij në Shkodër, iu përgjigjën me breshëri, nga të cilat ranë për t’u bërë të pavdekshëm 4 martirët e 2 prillit dhe u plagosën 87 qytetarë të tjerë në rrugët dhe sheshet e qytetit.Të dashur miq, Artan Broci, Bujar Bishanaku, Nazmir Kryeziu dhe Besmir Ceka ranë në lule të rinisë së tyre, por sakrifica e tyre u shndërrua në dritë, në rrugën e shqiptarëve për zgjedhje të lira.Masakra e regjimit komunist në Shkodër jehoi si një barbari në të katër anët e planetit.Parlamenti Europian, Kongresi i SHBA, qeveritë e vendeve mike, panë te ajo masakër fytyrën e vërtetë të regjimit që pretendonte se po pranonte pluralizmin.Sot, pas 33 vitesh, ne nderojmë dhe do nderojmë përjetë veprën e martirëve të 2 prillit.Por duhet të jemi realistë, ne këtë vit, për herë të parë nga ajo datë, i nderojmë me kokën e ulur.Sepse përsëri në maj të vitit që shkoi, pasardhësit e bllokmenëve hoxhistë, Edi Rama dhe suita e tij i rrëmbyen Shkodrës votën dhe fitoren.Por kësaj radhe nuk ishin falangat e Sigurimit të Shtetit, por ishin falangat e krimit më të egër, më të urryer të Shkodrës dhe Shqipërisë.Edi Rama, siç përdori Ramiz Alia policinë politike në vitin 1991, përdori famëzinjtë Bajrat, Gjokat dhe vrasës të tjerë serialë për të mposhtur dhe dhunuar vullnetin e qytetarëve të Shkodrës, që nuk i mposhti kurrë asnjë diktaturë, asnjë pushtim.Në këtë kontekst, ne jemi pafundësisht të detyruar ndaj idealeve dhe sakrificave të martirëve të 2 prillit.Të dashur miq, sot Edi Rama ka në duart e tij të zeza pushtet të paktën 10 përqind më shumë se ç’kishte Ramiz Alia në vitin 1991.Ai sot kontrollon të gjitha pushtetet.Edi Rama nuk ka një polici sekrete siç kishte Ramiz Alia, por ka një aleancë të tmerrshme me krimin e organizuar në Shkodër dhe mbarë vendin, me të cilën tmerron qytetarët e lirë dhe i kontrollon ata.Edi Rama, njësoj si Ramiz Alia, bën përpjekje të mëdha për të zhdukur opozitën.Edi Rama është sot përfaqësues i një regjimi që ka boshatisur Shqipërinë më shumë se çdo regjim tjetër në tërë historinë e saj.Që ka boshatisur Shkodrën më shumë se çdo regjim tjetër në tërë hsitorinë e saj.Ndaj dhe kjo ditë e sakrificës sublime, e martirizimit të Arben Brocit, Bujar Bishanakut, Nazmir Kryeziut dhe Besmir Cekës, është ditë kushtrimi, është ditë thirrje për çdo demokrate dhe demokrat, për të garantuar votën e lirë të shqiptarëve.Për të rrëzuar këtë regjim dhe të ecur drejt zgjedhjeve të lira dhe të ndershme me një qeveri teknike.Edhe njëherë, nderim përjetë veprës, sakrificës së pavdekshme të martirëve të 2 prillit.Nderimin më të madh familjeve të tyre, Shkodrës, Rozafës së lirisë së shqiptarëve.
Në emër të familjarëve, vëllai i Arben Brocit dhe mbesa e Bujar Bishanakut kërkuan që kjo ngjajre të mos harrohet, por të jehojë si një kushtrim për të mbrojtur ato ideale për të cilat ata dhanë jetën.
Kurora me lule dhe përkujtim të kësaj ngjarje për herë të parë pas 33 vitesh bënë edhe socialistët. Benet Beci pasi theu akullin me përkujtimin e demostratës së Postribës, u rishfaq këtë herë për të nderuar 2 Prillin bashkë më kryetarin e këshillit bashkiak Oltion Luli. Të ndarë këtë ngjarje e përkujtuan edhe grupimi i Lulzim Bashës, në emër të të cilit u vendos kurora me lule nga anëtari i kryesisë Xhemal Bushati dhe kreu i degës së PD Xhevdet Amuli.
