Drejtuesit e automjeteve duhet të zbatojnë rregullat e reja të qarkullimit, pasi në të kundërt do të përballen me masa më të ashpra. Ndryshimet në Kodin Rrugor, të cilat hyjnë në fuqi më datën 5 Gusht, përcaktojnë se drejtuesi i mjetit, i cili konstatohet duke drejtuar mjetin pa qenë i pajisur me leje drejtimi, i shtyhet për një periudhë prej 1 viti e drejta për t’u pajisur me leje drejtimi pranë sistemit të autoshkollave si masë administrative ndëshkuese.
Kur drejtuesi i mjetit është i mitur, afati për t’u pajisur me leje drejtimi pranë sistemit të autoshkollave shtyhet për një periudhë 2-vjeçare nga momenti kur i lind kjo e drejtë sipas legjislacionit në fuqi.
Ndryshimet në nenin 5 të ligjit, përcaktojnë se për drejtuesit e automjeteve që janë pajisur me leje drejtimi të kategorisë B, brenda dy viteve të fundit kufiri i lejuar i alkoolit në gjak është 0.0‰; shpejtësia maksimale e lejuar është 90 km/orë në autostrada dhe rrugë interurbane kryesore, si dhe 80 km/ orë jashtë qendrave të banuara.
Shkeljet e këtyre kufizimeve dënohen me gjobë 5 mijë deri në 15 mijë lekë, u pezullohet patenta për 1 muaj, si dhe u hiqen pikët. Pas përfundimit të periudhës së provës prej 2 vitesh pa shkelje, kufizimet hiqen automatikisht. Ndërsa për ata që kapen në shkelje dhe u janë hequr të paktën 10 pikë, periudha e kufizimeve zgjatet edhe me 1 vit.
Një ndër ndryshimet më të rëndësishme në Kodin Rrugor është ai që lidhet me përdorimin e alkoolit. Kështu, kur drejtuesi i automjetit konstatohet me një vlerë alkoolike më të lartë se 0,5 gram për litër (g/l) në gjak dhe ky drejtues është konstatuar e ndëshkuar më parë për drejtim mjeti nën ndikimin e alkoolit ose në gjendje të dehur, në rast përsëritjeje, merret masa e heqjes së lejes së drejtimit përgjithmonë.
Drejtuesit e mjetit që bëjnë gara shpejtësie duke sjellë rrezik serioz për përdoruesit e rrugës, sidomos në zonat urbane, përfshirë manovrat agresive, ndryshimet e shpeshta të korsisë pa sinjalizim dhe sjelljet jo sociale në rrugë do të përballen me gjoba më të larta, të cilat variojnë nga shkojë në 20 mijë – 60 mijë lekë.
Ndryshimet parashikojnë gjithashtu se ndalohet, përdorimi i telefonit celular të mbajtur me dorë gjatë drejtimit të mjeteve të tjera, përfshirë biçikletat, motomjetet deri në 50 cc dhe monopatinat me motor.
