Finalizohet në Malësinë e Madhe operacioni policor i koduar “MULTIGAMES”, gjatë të cilit është zbuluar një lokal në qytetin e Koplikut, i përshtatur për lojëra fati dhe ku, sipas Policisë, dyshohet se shitej lëndë narkotike.
Operacioni u zhvillua nga Seksioni për Hetimin e Krimeve Ekonomike dhe Financiare dhe Seksioni për Hetimin e Narkotikëve, në bashkëpunim me Forcën e Posaçme “Shqiponja” të DVP Shkodër.
Gjatë kontrollit në ambientet e lokalit, shërbimet e Policisë gjetën dhe sekuestruan 6 makineta elektronike për lojëra fati, një sasi lënde të dyshuar narkotike Cannabis Sativa, si dhe një grirëse që dyshohet se përdorej për përpunimin e lëndëve narkotike.
Në vijim të veprimeve, u arrestua në flagrancë Alban K., 47 vjeç, banues në Koplik dhe punonjës i lokalit.
Ndërkohë, Policia ka shpallur në kërkim E. C., 51 vjeç, banues në Koplik dhe administrator i lokalit. Punohet për lokalizimin dhe kapjen e tij.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
Hetimet vijojnë për dokumentimin e plotë të aktivitetit të paligjshëm dhe përgjegjësive të personave të përfshirë.
