Seksioni për Hetimin e Krimeve ndaj Pasurisë ndaloi shtetasin E. B., 23 vjeç, banues në Shkodër, pasi Gjykata e Shkallës së Parë e Juridiksionit të Përgjithshëm Shkodër i ka caktuar këtij shtetasi masën e sigurisë “Arrest në burg”, për veprat penale “Shtrëngimi me anë të kanosjes ose dhunës për dhënie pasurie”, “Mbajtja pa leje dhe prodhimi i armëve, armëve shpërthyese dhe municionit” dhe “Prishja e qetësisë publike”.
Gjithashtu, këtij shtetasi, Gjykata e Shkallës së Parë e Juridiksionit të Përgjithshëm Tiranë i ka caktuar masën e sigurisë “Arrest në burg”, për veprat penale “Vrasja në rrethana të tjera cilësuese”, kundër dy ose më shumë personave, mbetur në tentativë, si dhe “Mbajtja pa leje dhe prodhimi i armëve, armëve shpërthyese dhe municionit”.
Në vijim të informacionit paraprak të dhënë dje, për aksidentin në aksin rrugor “Shkodër–Koplik”, në fshatin Grizhë, bëjmë me dije se specialistët e Qarkullimit Rrugor arrestuan në flagrancë shtetasin A. M., 24 vjeç, banues në Itali, për veprën penale “Shkelja e rregullave të qarkullimit rrugor”, me pasojë vdekjen.
Gjithashtu, specialistët e Qarkullimit Rrugor referuan materialet në Prokurori, ku nisi procedimi penal për shtetasit:
* E. B., 77 vjeç, banues në fshatin Trush, pasi dje, në Velipojë, duke drejtuar automjetin pa leje drejtimi, është përplasur me motomjetin me drejtues shtetasin Rr. Rr., 64 vjeç, banues në fshatin Reç, dhe është larguar nga vendi i ngjarjes. Si pasojë, është dëmtuar lehtë shtetasi Rr. Rr., i cili, pasi mori mjekim në Spitalin Rajonal Shkodër, është larguar në banesë;
* E. M., 48 vjeç, banues në fshatin Bardhaj, pasi u kap duke drejtuar automjetin pa leje drejtimi.
Specialistët për Hetimin e Krimeve të Stacionit të Policisë Velipojë referuan materialet në Prokurori, ku nisi procedimi penal për shtetasin L. P., 46 vjeç, pronar i një subjekti, pasi dje duke e ndihmuar shtetasi P. D., 73 vjeç, ky i fundit ka rrëshqitur në një pedanë dhe ka rënë me kokë, dhe si pasojë ka ndërruar jetë.
Specialistët për Hetimin e Krimeve të Komisariatit të Policisë Malësi e Madhe referuan materialet në Prokurori, ku nisi procedimi penal për shtetasit:
* S. D., 18 vjeç, banues në qytetin Koplik, pasi gjatë kontrollit në banesë, nga shërbimet e Policisë, iu gjet një shkop druri si ata të bejsbollit, i cili u sekuestrua në cilësinë e provës materiale;
* F. T., 34 vjeç, M. T., 45 vjeç, dhe N. T., 40 vjeç, të tre banues në fshatin Reç, pasi, në fshatin Razëm, me pretendimin se është pronë e tyre, dyshohet se kanë dëmtuar gardhin rrethues të një sipërfaqeje toke, në pronësi të shtetases M. Q., 61 vjeçe, banuese në fshatin Reç.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
