Policia ka identifikuar dhe vënë në pranga dy prej autorëve të dyshuar të sulmit të një nate më parë ndaj shtetasit Edison Tirana, i cili u qëllua me armë zjarri dhe u dhunua me sende të forta. Në pranga kanë rënë vëllezërit Gjovalin Gjekaj 63 vjec dhe Pëllumb Gjekaj 51 vjec banues në Bajzë të Malësisë së Madhe, ndërsa nipi i tyre K. Gjekaj 34 vjec është shpallur në kërkim. Sipas hetimeve paraprake, dy të arrestuarit dyshohet se qëlluan me armë zjarri drejt automjetit të 42-vjeçarit Edison Tirana, banues në Trush të njësisë Bërdicë, dhe më pas e kanë goditur fizikisht. Konflikti, sipas deklarimeve të viktimës, ka nisur në doganën e Hanit të Hotit për shkak të një parakalimi mes dy automjeteve. Përplasja mes tyre është përshkallëzuar gjatë rrugës, ndërsa mjetet kanë vijuar të parakalojnë njëra-tjetrën shoqëruar me debat verbal. Në afërsi të rrethrrotullimit të Koplikut, dy vëllezërit Gjekaj dyshohet se kanë qëlluar me pistoletë në drejtim të makinës “Mercedes-Benz” që drejtonte Tirana. Një prej plumbave ka goditur gomat e automjetit, duke bërë që 42-vjeçari të humbasë kontrollin dhe të përplaset në bordurën e një karburanti. Pas aksidentit, ai ka tentuar të fshihet në një tokë aty pranë, por autorët e dyshuar e kanë ndjekur dhe e kanë goditur me sende të forta, duke i shkaktuar plagë në trup. Edison Tirana u paraqit rreth orës 19:30 në spitalin e Shkodrës, ku mori ndihmën e parë dhe ndodhet jashtë rrezikut për jetën. Ai ka dhënë deklarimin e tij në polici, duke sqaruar dinamiken e konfliktit që nisi për shkak të parakalimit. Strukturat e policisë kanë bërë të mundur identifikimin e shpejtë të personave të përfshirë, duke arrestuar dy vëllezërit Gjekaj dhe duke shpallur në kërkim një të tretë. Si provë materiale u sekuestrua një armë zjarri pistoletë, si dhe 4 automjete. Hetimet vijojnë për zbardhjen e plotë të ngjarjes së ndodhur mbrëmjen e se shtunës.
