Në vijim të informacionit paraprak të dhënë dje, për shtetasin A. L., 30 vjeç, i cili dyshohet se u vetëplagos me armë zjarri, bëjmë me dije se:
Specialistët për Hetimin e Krimeve të Komisariatit të Policisë Shkodër referuan materialet në Prokurori, ku nisi procedimi në gjendje të lirë për 30-vjeçarin, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe mbajtja pa leje e armëve të gjuetisë dhe sportive”, pasi dyshohet se posedonte pa leje 1 pushkë pneumatike sportive, 12 kapsolla detonatorë, municion luftarak dhe armën e zjarrit automatik me të cilën tentoi të vetëvritej, të cilat u sekuestruan në cilësinë e provës materiale. Shtetasi A. L. po merr mjekim në Spitalin e Traumës dhe është jashtë rrezikut për jetën.
Specialistët e Sektorit të Qarkullimit Rrugor arrestuan shtetasin D. L., 34 vjeç, banues në fshatin Bushat, pasi u kap duke drejtuar automjetin, në gjendje të dehur.
Specialistët e Sektorit për Hetimin e Narkotikëve referuan materialet në Prokurori, ku nisi procedimi në gjendje të lirë për shtetasin T. V., 23 vjeç, pasi gjatë kontrollit fizik, shërbimet e Focës së Posaçme “Shqiponja” i gjetën një sasi të vogël lënde të dyshuar narkotike kanabis. Lënda narkotike u sekuestrua në cilësinë e provës materiale.
Specialistët për Hetimin e Krimeve të Komisariatit të Policisë Shkodër referuan materialet në Prokurori, ku nisi procedimi në gjendje të lirë për shtetasit D. F., 19 vjeç, banues në fshatin Shtoj i Ri, dhe një 17-vjeçar, pasi dyshohet se kanë hedhur sende të forta në drejtim të tifozëve, gjatë zhvillimit të ndeshjes së futbollit “Vllaznia-Elbasani”.
Specialistët për Hetimin e Krimeve të Komisariatit të Policisë Shkodër referuan materialet në Prokurori, për vlerësim, për rastet e mëposhtme:
-dje, ka kallëzuar shtetasi G. A., 57 vjeç, banues në Shkodër, se shtetasi F. L., 66 vjeç, banues në fshatin Shtoj i Ri, i ka shembur murin e një objekti (magazinë), me pretendimin se është pronë e tij;
-dje, është paraqitur në Spitalin Rajonal Shkodër, me dëmtime në trup, shtetasi N. V., 46 vjeç, i cili ka deklaruar se është rrëzuar nga biçikleta. Punohet për verifikimin e rastit;
-mbrëmjen e djeshme është paraqitur në Spitalin Rajonal Shkodër, në gjendje të rëndë shëndetësore, shtetasi M. Sh., 31 vjeç, banues në Shkodër, i cili dyshohet se ka konsumuar sasi të madhe pije alkoolike. Punohet për verifikimin e rastit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
