Në vazhdën e aksionit të nisur kundër ndërtimeve pa leje, një ditë më parë u shemb edhe resorti ‘Saint Michelle Residence’ në fshatin Shetaj në Durrës, në pronësi të ish-kreut të IMT Durres Ardian Halili, që e kishte ndërtuar pa leje në kohën që drejtonte këtë institucion gjatë viteve 2018-2021. Kryeministri Edi Rama ka reaguar për këtë, i cili teksa ka ndarë pamjet nga shpërthimi me tritol i resortit, shprehet se dje u vendos rendi ligjor për një abuzues që kishte marrë peng territorin, dhe që tashmë i është dorëzuar drejtësisë. Kreu i qeverisë jep një përgjigje edhe ndaj kritikave se ndërhyrjet për objektet pa leje janë bërë vetëm në Theth, teksa shprehet se puna vazhdon nga veriu në jug.
“Ca zëra në nisje të kësaj kthese të re thoshin “po pse Thethi e jo Jugu, po pse ashtu e jo kështu”, ndërkohë puna për mbrojtjen e vendit nga abuzuesit vazhdon në Veri, Jug dhe Shqipërinë e Mesme, ku konkretisht në Durrës është vendosur rendi ligjor mbi një territor të marrë peng nga një abuzues, i cili është ndaluar nga Policia e Shtetit e i është dorëzuar drejtësisë edhe si ish-drejtues i inspektorëve të Durrësit. Shumë prej jush këtu, kanë një të drejtë të madhe kur komentojnë, “Shumë mirë që po goditen këto shkelje, po për ata që i kanë lejuar duke mbyllur sytë këto shkelje çfarë masash do merren?!”, prandaj paketa e re e masave do të parashikojë ndëshkime edhe për “symbyllurit”, ka shkruar kryeministri.
