Në Shkodër kanë përfunduar punimet për rikonstruksionin e zonës së njohur si “Fermentimi”, një prej ndërhyrjeve të para të këtij lloji në kuadër të programit kombëtar për përmirësimin e infrastrukturës në zonat informale që ndodhen në proces legalizimi. Lajmin e ndau ministri i Ekonomisë, Kulturës dhe Inovacionit Blendi Gonxhja.
Projekti përfshiu:
Rikonstruksionin e 6 rrugëve: “Besa”, “Ardian Kodra”, “Dëshmorët”, “Çlirimi”, “12 Vjetori” dhe “Ora e Maleve”;
Ndërtimin e 3.1 kilometrave rrugë të reja;
Sistemin e kanalizimeve për ujërat e bardha dhe të zeza;
Rrjetin e ujësjellësit;
Ndriçimin publik dhe linjat për fibra optike.
Në total janë përmirësuar rreth 10,500 m² sipërfaqe, nga ku përfitojnë mbi 1,000 banorë, përfshirë 115 familje, shumica prej të cilave në kushte të vështira ekonomike. Investimi i realizuar kap vlerën e 76.6 milionë lekëve.
Autoritetet e cilësuan projektin si një hap domethënës për përmirësimin e kushteve të jetesës në këtë zonë, e cila prej shumë vitesh ka vuajtur mungesën e infrastrukturës bazë. Sipas tyre, ndërhyrja është gjithashtu një shembull i bashkëpunimit mes qeverisjes qendrore dhe asaj vendore.
