Vllaznia eliminohet shpejt nga Champions League për femra. Skuadra kampione e Shqipërisë në futboll për femra, Vllaznia, e ka mbyllur para kohe aventurën në Ligën e Kampioneve. Shkodranet u mundën në “Loro Boriçi” nga Dinamo Minsk e Bjellorusisë me rezultatin 2-1, duke i dhënë lamtumirën turneut që në turin e parë kualifikues. Edhe pse gjatë merkatos verore klubi kishte bërë disa afrime të rëndësishme nga Amerika e Veriut dhe e Jugut, mungesa e Megi Doçit, e pezulluar për shkak të kartonit të kuq të sezonit të kaluar, u ndje dukshëm në fushë. Dinamo Minsk tregoi superioritet që në fillim, duke kaluar në avantazh në fundin e pjesës së parë me golin e Tikhomirova. Në fillim të pjesës së dytë, Pilipenko dyfishoi shifrat, duke e vënë Vllazninë në vështirësi të mëdha. Përpjekjet e vajzave shkodrane u shpërblyen vetëm në minutën e 88-të, kur Bajraktari shënoi golin e nderit, por tepër vonë për të ndryshuar fatin e sfidës. Ndeshja u mbyll 2-1 në favor të bjelloruseve, të cilat avancojnë në finalen e miniturneut kundër Ferencvaroshit, ndërsa Vllaznia duhet të presë një tjetër sezon për të synuar rikthimin në fazën e grupeve të Champions-it.
