Në një reagim të fortë dhe të drejtpërdrejtë, Kryeministri Edi Rama dënon ashpër zjarrvëniet e qëllimshme që po rrezikojnë mjedisin dhe pasurinë e përbashkët të shqiptarëve. Ai i cilëson këto akte jo vetëm si krime, por si një tradhti ndaj tokës dhe të ardhmes së vendit. Me pamje tronditëse të kapura nga dronët e Forcës Ajrore dhe me Policinë e Shtetit në ndjekje të autorëve, Rama kërkon një ndryshim të fortë ligjor: zjarrvënia të barazohet me vrasjen në Kodin Penal, sidomos në kushtet e krizës klimatike që po prek rëndë rajonin e Mesdheut.
STATUSI I RAMES:
Të ndezësh një zjarr me qëllim, nuk është vetëm krim, por është tradhti ndaj tokës sonë dhe të ardhmes së fëmijëve tanë. Ja dhe pamjet e një zjarrvënieje të qëllimshme të evidentuar sot nga dronët e Forcës Ajrore. Policia e Shtetit është në terren për të çuar përpara drejtësisë këdo që luan me flakët mbi pasurinë e përbashkët. Ndërkohë, në këtë kohë të vështirë ngrohjeje globale dhe flakësh që po sfidojnë të gjitha shtetet e Mesdheut sidomos, zjarrvënien do të duhet ta barazojmë me vrasjen në Kodin Penal.
