Kryeministri Edi Rama ka reaguar ashpër ndaj sjelljes së papranueshme të një efektivi të Policisë së Shtetit, i përfshirë në një konflikt fizik jashtë shërbimit, duke theksuar vendosmërinë për ndëshkime të menjëhershme dhe shembullore. Në fokusin e reformës së re për kontrollin e territorit, ai paralajmëron ashpërsim të masave për të gjithë punonjësit e shtetit që shkelin ligjin apo abuzojnë me detyrën, si gjatë ashtu edhe jashtë orarit të punës.
Statusi Rames:
Pezullimi nga detyra i efektivit të Policisë së Shtetit Dibër, që jashtë shërbimit ka marrë pjesë në një konflikt të shëmtuar fizik në Vlorë, është vetëm masa e parë që duhet të pasohet nga përjashtimi i këtij individi pa kthim në radhët e policisë, si edhe nga dorëzimi i tij në duart e drejtësisë sapo të dalë nga spitali. Ndërkohë në pakon e masave të reja të reformës së kontrollit të territorit, janë përshirë edhe rritje të peshës së përgjegjësisë para ligjit të të gjithë punonjësve të shtetit që operojnë në kontakt më komunitetet e me qytetarët, të cilëve nuk do t’u tolerohen shkeljet e asnjë natyre që cënojnë komunitetin apo qytetarin, qoftë gjatë orëve të shërbimit qoftë jashtë orëve të shërbimit. *Shembull: Çdo punonjës i shtetit që zotëron një ngrehinë pa leje për qëllim fitimi apo që shfrytëzon një hapësirë publike për të nxjerrë fitim (përveç ndëshkimeve të njëjta për të gjithë) do të ndiqet penalisht dhe do të përjashtohet nga detyra pa të drejtë kthimi në një punë në sektorin shtetëror për një numër të konsiderueshëm vitesh
