Duke nisur nga kjo e hënë, punonjësit e Policisë së Shtetit do të punojnë 12 orë në ditë për një periudhë tre muajsh gjatë sezonit veror. Ky angazhim është i lidhur ngushtë me menaxhimin e fluksit të turistëve që pritet të vizitojnë Shqipërinë. Përqendrimi i punës do të jetë kryesisht në zonat e plazheve, ku numri i punonjësve të Policisë do të jetë më i madh. Po ashtu, rëndësi e madhe do t’i jepet menaxhimit të trafikut, veçanërisht në destinacionet turistike që shohin flukse të larta të vizitorëve.
Sipas burimeve të brendshme, përveç pagës të zakonshme, punonjësit do të paguhen edhe për orët shtesë të punës gjatë sezonit veror. Megjithatë, ky fakt nuk mund të fshehë një tjetër problem: kufizimi i pushimeve verore. Ashtu si ndodhi edhe vitin e kaluar, punonjësit e Policisë do të kenë mundësi të marrin pushime vetëm pas mbarimit të sezonit veror, duke krijuar një ngërç të rëndë në shfrytëzimin e pushimeve të merituara. Pushimet e kufizuara dhe orët e gjata të punës krijojnë kushte të vështira për punonjësit dhe mund të kenë ndikime negative në performancën e tyre.
