Kryeministri Edi Rama ka theksuar angazhimin e qeverisë për realizimin e dy projekteve ambicioze, të cilat do të transformojnë Shkodrën dhe do të kenë një ndikim të madh në zhvillimin e rajonit.
Rama ka shprehur besimin se këto projekte, të cilat i janë besuar një arkitekti me çmime ndërkombëtare, do të ndryshojnë rrënjësisht pamjen dhe funksionimin e qytetit. Ai ka përmendur dy elementë të rëndësishëm: Muzeun e Kujtesës dhe Muzeun e Gjetheve, të cilët pritet të ndihmojnë në përmirësimin e imazhit të Shkodrës, si dhe krijimin e mundësive për më shumë turizëm dhe të ardhura për qytetin.
Po ashtu, Rama ka theksuar nevojën për një parkim të madh nëntokësor dhe përmirësimin e infrastrukturës, duke synuar lehtësimin e trafikut dhe mbështetje të mëtejshme për këtë qytet të rëndësishëm.
Edi Rama: Kemi dy projekte tepër ambicioze, që i janë besuar njeriut të duhur. Arkitektin që bën projektet e çmoj shumë, pasi ka marrë çmime prestigjoze ndërkombëtare. Ne po punojmë në Bashkinë e Shkodrës, që gjithçka të ndryshojë, sepse e dimë shumë mirë sesa impakt ka që të ndryshojë hyrja e qytetit dhe sa ndikon kjo në jetën e përditshme dhe imazhin e një vendi. Nuk e dyshoj që Muzeu i Kujtesës do të jetë hapësirë që do ketë shumë impakt, njësoj si Muzeu i Gjetheve. Padyshim që nga ky projekt, Shkodra do të ndryshojë imazhin e saj. Patjetër që do të jetë më shumë vizitorë e turistë, që do të thotë do të jetë më shumë të ardhura. Ne do të bashkëpunojmë me Bashkinë e Shkodrës për Muzeun, por barrën kryesore do ta mbajë qeveria. Në bashkëpunim me Bashkinë Shkodër, do ndërtohet edhe një parkim i madh nëntokësor. Dëshirojmë që të jetë infrastrukturë e tillë, që të lehtësojë barrën e trafikut. Kemi shumë plane që kryeqytetit të veriut t’i japim të gjithë mbështetjen për ta forcuar sa më shumë”.
