Gjykata e Kralevës ka liruar tre efektivët Kosovarë të kapur nga forcat serbe në territorin e Kosovës.
Rifat Zeka, Beqir Sefi dhe Mustafë Shemi janë rrëmbyer pak javë më parë brenda territorit të Kosovës, ashtu siç kanë deklaruar institucionet e vendit.
Ata u arrestuan nga forcat serbe, ndërsa ditë më parë prokuroria në Serbi kishte caktuar masën e paraburgimit ndaj tyre.
Tre policët janë vizituar nga familjarët e tyre të premten, derisa njërit prej tyre i janë siguruar edhe barnat.
Kosova ka kërkuar lirimin e menjëhershëm të policëve të rrëmbyer, mirëpo kjo nuk ka ndodhur deri tani, ani pse këtë e kanë kërkuar Bashkimi Evropian si dhe Shtetet e Bashkuara të Amerikës.
Në një konferencë për media, kryeministri Kurti dhe ministrja Gërvalla, kanë shpalosur detaje për vizitën e ambasadorit Jetishi te tre policët kufitarë.
Kurti tha se policët i kanë rrëfyer Jetishit momentin e rrëmbimit nga njësitë serbe
“Të tre kanë qenë bashkë. Të tre e kanë rrëfimin e njëjtë kur pyetën ndaras nga njëri-tjetri nga ambasadori ynë. Përshkrimi i policëve është i njëjtë. Janë tri rrëfime të ndara identike, të cilët thonë se në momentin e rrëmbimit më 14 qershor kanë qenë tek tryeza e improvizuar për ngrënie. Pra kanë qenë duke ngrënë drekë kur 15 persona i kanë rrethuar, sulmuar dhe rrëmbyer”, deklaroi Kurti.
Ndërsa, Gërvalla ka treguar për kushtet në të cilat gjenden ata.
“Nga momenti i shqiptimit të masës së zgjatjes së paraburgimit për 30 ditë, tre oficerët janë vendosur në Qendrën e Paraburgimit në Kralevëve. Ata janë të vendosur në dhoma të veçanta tek e tek, mirëpo nuk kanë qasje as në TV ose në ndonjë formë të mediave të shkruara ose tjera. Sipas tyre, trajtimi nga gardianët dhe stafi tjetër është korrekt, atyre u jepet ushqim në baza të rregullta ditore, edhe pse sipas njërit prej tyre cilësia është jo e mirë. Dje autoritetet e burgut iu kanë dhënë ndërresa të brendshme dhe aksesorë të higjenës, por Mustafa ka thënë se i mungojnë medikamentet bazike që i përdor rregullisht për gjendjen shëndetësore dhe kjo po ia vështirëson qëndrimin në burg.
Përmes Jasharit dhe kontaktit me familjen e tij do të përpiqemi që të sigurojmë medikamentet për Mustafën.”, u shpreh ministrja.
Kryeministri i Kosovës, Albin Kurti është shprehur më herët se prokurori në Serbi i ka hedhur poshtë akuzat për terrorizëm kundër tre policëve të arrestuar, ndërsa i ka mbajtur në fuqi vetëm akuzat për posedim të paligjshëm të armëve.
Darko Gjoshic, komandati i njësistit special të policisë ushtarake të Serbisë, iu përgjigj akuzave të kryeministrit të Kosovës Albin Kurti, i cili tha se pjestarët e grupit të tij, janë personat që rrëmbyen tre policët e Kosovës disa ditë më parë.
Sipas Gjoshic, njësiti i policisë ushtrarake të Serbisë, që ndryshe njihet si Kobra, nuk ka qenë i angazhuar në rajonin e Kosovës.
“Njësiti ‘Kobra’ i Ushtrisë së Serbisë nuk ka qenë i angazhuar në rajonin e Kosovës e M. dhe kur me urdhër të kryekomandantit Aleksandar Vuçiq angazhohemi dhe kur e marrim atë urdhër, atëherë do ta zbatojmë plotësisht”, tha Gjoshic, duke folur për një media serbe.
Albin Kurti akuzoi këtë të fundit duke thënë se anëtarët e grupit që ai udhëheq, u futën në territorin e Kosovës dhe rrëmbyen policët, të cilët prej ditësh ende nuk janë liruar nga Serbia.
Qeveria e Kosovës pretendon se policët janë rrëmbyer në territorin e Kosovës, por Serbia e mohon këtë gjë, duke thënë se ata janë arrestuar në territorin e saj.
Shtetet e Bashkuara, Briatnia e Madhe por edhe shtete të tjera, përfshirë vendin tonë, kanë kërkuar nga Serbia lirimin e menjëhershëm të tre policëve.
