Dy vëllezërit e arrestuar për vrasjen e Ramazan Mataj në fshatin Dragoç të Postribës në Shkodër, kanë mbajtur qëndrime të kundërta përpara oficerëve të policisë gjyqësore. Arjon Hasaj ka pranuar se është autori i krimit të rëndë, ndërsa i vëllai Klisman Hasaj ka mohuar akuzat ndaj tij, duke thënë se nuk ka qenë në dijeni të veprimeve të vëllait dhe faktit që do kryente vrasje. 29 vjecari Arjon Hasaj ka treguar në detaje ngjarjën e rëndë, e cila ka ardhur sipas tij për shkak të lidhjes që viktima kishte me të motrën prej afro 6 vitesh.
“Unë jam personi që e kam vrarë shtetasin Ramazan Mataj. Prej 6 vitesh ai kishte një lidhje me motrën tonë. Ramazani është personi që i ka prishur dy martesa motrës në 6 vitet e fundit. Ai këtë histori ia ka treguar shumë personave në fshat dhe më gjerë, ndërsa është personi që divorcoi dy herë motrën tonë. Madje ka shpërndarë edhe disa video tek ish-burri i dytë dhe tek njerëz të tjerë në fshat në momente intime me motrën. Unë hapa një llogari false në Instagram me emrin e një vajze dhe lashë një takim me Ramazan Mataj. Ai erdhi dhe aty e qëllova me armë zjarri. Më pas armën e fsheha disa metra më tutje nga vendi ku e vrava. Pas vrasjes jam larguar me biçikletë drejt banesës. Armën e kam patur në shtëpi prej disa kohësh. Motra ka disa kohë që nuk jeton në banesën tonë, jetonte në Shkodër”,
Ndërkohë i vëllai Klismani në deponimin e tij ka sqaruar:
“Nuk kam patur asnjë dijeni për vrasjen që do kryente vëllai dhe nuk kam lidhje me atë ngjarje”.
Pas ngjarjes së rëndë policia e Shkodrës ka kryer përgjime në banesën e familjes Hasaj. Gjatë përgjimeve dy vëllezërit kanë folur për vrasjen e realizuar nga Arjoni si dhe në një moment del se autori kryesor është penduar që kishte fshehur armën dhe ka shkuar duke e marrë sërish dhe duke e groposur në oborrin e shtëpisë për ta patur për siguri. Pas këtyre përgjimeve policia arrestoi dy vëllezërit Hasaj si autor të dyshuar të vrasjes së shtetasit Ramazan Mataj. Pritet që të enjten dy vëllezërit të dalin përpara gjykatës për tu njohur me masën e sigurisë./ newspower.al
