Vermoshi, fshati turistik në qarkun e Shkodrës, vitet e fundit është kthyer një nga destinacionet turistike të preferuara për turistët dhe të gjithë të apasionuarit e alpinizmit. Kryeministri Edi Rama publikoi në rrjetet sociale disa pamje mahnitëse nga Vermoshi. Një ftesë kjo për ata që shijojnë turizmin malor.
Me pamjen përrallore të Vermoshit, ju uroj një të diel të paqtë.
Në Vermosh shtëpitë tradicionale alpine, sot janë kthyer në bujtina mikpritëse për vizitorët.Fshati më i madh i Alpeve të Shqipërisë, Vermoshi është një luginë me origjinë akullnajore, e vendosur në lartësinë 1100 metra mbi nivelin e detit.
Në të dyja anët e luginës, ngrihen shpate malesh me pjerrësi të konsiderueshme dhe të veshura me pyje dhe kullota. Vermoshi shquhet për panoramën e tij, si dhe për reshjet e dëborës që zgjasin afro 100 ditë në vit.
Aktivitetet kryesore të cilat mund të zhvillohen në Vermosh, janë ngjitjet malore në Malësinë e Marlules apo edhe shëtitjet në luginat e thella alpine të Lepushës dhe Cemit.
