Një tjetër histori suksesi nga mjekët shqiptarë jashtë vendit vjen këtë herë nga Shtetet e Bashkuara të Amerikës. Kardiologu shkodran, Dr. Luan Dragusha, pjesë e ekipit të njërës prej qendrave spitalore më prestigjioze në botë, Cleveland Clinic, ka realizuar me sukses një ndërhyrje delikate në zemër.
Pacientja, një grua amerikane 88-vjeçare, iu nënshtrua një procedure për vendosjen e një valvule të re kardiake. Pas operacionit, ajo shprehu dëshirën e saj për të jetuar deri në moshën 100-vjeçare, ndërsa Dr. Dragusha deklaroi se kjo ndërhyrje i jep asaj shanset reale për të arritur objektivin.
“Pas kësaj procedure, besoj se ka mundësi të arrijë synimin e saj për të jetuar deri në 100 vjeç,” u shpreh Dr. Dragusha.
Ky rast tregon jo vetëm profesionalizmin dhe përkushtimin e tij, por edhe rolin e rëndësishëm që mjekët shqiptarë po luajnë në disa nga institucionet më të njohura shëndetësore në botë, duke e bërë të njohur emrin e Shqipërisë përmes arritjeve të tyre.
