Qeveria i ka thënë jo votimit elektronik edhe në 7 bashki të tjera për zgjedhjet e ardhshme vendore pasi Ministria e Financave ka parashikuar vetëm 15 milionë euro për të përballuar koston e lokaleve të vitit 2023.
Drejtuesi i KQZ në shkresën drejtuar ekzekutivit ka kërkuar 37 mln euro për t’i dhënë mundësi qytetarëve në bashkitë e mëdha në vend, që të votojnë në mënyrë elektronikë për kryebashkiakun e tyre. Por nga fondi i paraqitur në projektbuxhetin për vitin 2023 Ministria e Financave nuk i ka plotësuar pritshmëritë e KQZ duke e lënë pezull çështjen e teknologjisë në zgjedhje.
Sipas burimeve nga KQZ, 15 mln euro nuk i japin mundësi këtij institucioni që të parashikojë votime elektronike në asnjë bashki, pasi paratë e vendosura në dispozicion janë të pamjaftueshme.
Me këtë fond, sipas Komisionit mund të përballohet vetëm një proces tradicional, votim dhe numërim me fletë, pasi shpenzimet e shtuara për mirëmbajtjen e pajisjeve të identifikimit elektronik, kamerat e vendosura në çdo qendër votimi, materialet zgjedhore dhe paga për administratën nuk i japin mundëi kryekomisionerit për të manovruar elektronikisht.
Edhe pse Celibashi ka edhe një mundësi të dytë për t’i marrë paratë e kërkuara qeverisë, por fillimisht duhet të bindë PS që të pranojë votimin elektronik në 7 bashki. Në rast se kjo do të ndodhë, kryekomisioneri së bashku me deputetët e majtë dhe të djathtë do të mund ta bindin ministren e Financave në komisione kur të raportohet buxheti, që t’i japë KQZ pjesën tjetër të parave, dhe 22 mln euro të tjera.
