Strukturat e DVP Shkodër kanë finalizuar me sukses operacionin e koduar “NDËRMOLLASI 2”, në kuadër të goditjes së veprimtarive kriminale në fushën e armëmbajtjes pa leje dhe narkotikëve.
Operacioni u zhvillua nga Sektori për Hetimin e Krimeve të Rënda, në bashkëpunim me Seksionin për Mbështetjen Operacionale të Hetimit dhe Seksionin e Forcës së Posaçme “Shqiponja”, nën drejtimin e Prokurorisë.
Gjatë ndërhyrjes, shërbimet e Policisë ushtruan kontroll në banesën e shtetasit R. M., 29 vjeç, në fshatin Ura e Shtrenjtë, i arrestuar më herët, më datë 14.09.2025, në kuadër të operacionit “Ndërmollasi”. Si rezultat i kontrollit u gjetën dhe u sekuestruan në cilësinë e provës materiale:
-
11 armë zjarri;
-
5506 fishekë luftarakë;
-
7 krehra për armë zjarri automatike dhe 6 krehra për pushkë;
-
35 metra fitil detonator;
-
25.2 kilogramë lëndë e dyshuar narkotike Cannabis Sativa;
-
2 palë targa të huaja, njëra e Gjermanisë dhe tjetra e Austrisë.
Në vijim të veprimeve procedurale u arrestuan edhe shtetasit Sami Meaj, 29 vjeç, dhe Selim Myrtja, 31 vjeç, të dy banues në fshatin Ura e Shtrenjtë. Sipas hetimeve paraprake, ata dyshohet se janë posedues të armëve dhe lëndës narkotike, si dhe bashkëpunëtorë të shtetasit R. M.
Nën drejtimin e Prokurorisë, vijojnë hetimet për dokumentimin e plotë të kësaj veprimtarie kriminale dhe për identifikimin e personave të tjerë që mund të jenë të përfshirë.
Materialet procedurale i janë referuar Prokurorisë së Shkodrës për veprime të mëtejshme.
