Drejtoria Vendore e Policisë Shkodër ka vijuar veprimet procedurale në kuadër të kontrolleve të përditshme për garantimin e rendit dhe sigurisë publike, duke evidentuar disa raste që kanë përfunduar me ndalime, procedime penale apo ngjarje të tjera me karakter hetimor.
Specialistët e Sektorit të Qarkullimit Rrugor kanë arrestuar në flagrancë shtetasin F. T., 22 vjeç, banues në fshatin Drisht, pasi u kap duke drejtuar automjetin në gjendje të dehur.
Ndërkohë, janë referuar materialet në Prokurori dhe ka nisur procedimi në gjendje të lirë për disa shtetas të tjerë:
-
E. H., 34 vjeç, për përfshirje në një aksident automobilistik në aksin “Koplik-Shkodër”, ku pati vetëm dëme materiale. Ai u largua nga vendi i ngjarjes, por u kap më pas nga shërbimet e policisë.
-
Një 15-vjeçar, i cili po drejtonte automjetin pa leje drejtimi dhe goditi një automjet të parkuar, gjatë përpjekjes për t’u larguar nga kontrolli i Policisë Rrugore.
-
A. Ç., 51 vjeç, drejtues motomjeti që u përplas me një automjet në aksin “Kryebushat-Shkodër”. Nga aksidenti, ai mori lëndime të lehta. Ngjarja është njoftuar në Prokurori për hetime të mëtejshme.
Shërbimet e Komisariatit të Policisë Shkodër referuan materialet në Prokurori për shtetasin A. H., 51 vjeç, banues në fshatin Guri i Zi, i dyshuar për vjedhjen e një telefoni celular.
Nga Stacioni i Policisë Velipojë, janë referuar materialet për një rast aksidental, ku shtetasi K. Sh., 21 vjeç, u dëmtua gjatë punës në një restorant. Ai mori ndihmën mjekësore dhe ndodhet në gjendje të mirë shëndetësore.
Në Pukë, janë proceduar në gjendje të lirë shtetasit H. S., 55 vjeç dhe A. R., 49 vjeç, pas kallëzimit të një shtetasi tjetër, i cili pretendon se është kanosur prej tyre për të mos kaluar në një rrugë që ata e konsiderojnë si pronë të tyre, në lagjen “Dedaj” të Fushë Arrëzit.
Një ngjarje tragjike ka ndodhur në fshatin Nënmavriq, ku është gjetur i pajetë shtetasi Z. V., 47 vjeç. Nga këqyrja paraprake nuk janë konstatuar shenja dhune, dhe dyshohet se humbja e jetës ka ardhur si pasojë e pickimit nga bletët. Grupi hetimor po vijon punën për zbardhjen e plotë të rrethanave.
Të gjitha materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme hetimore.
