Prej më shumë se 10 orësh, zonat turistike të Razmës dhe Bogës ndodhen pa energji elektrike. Shkak për ndërprerjen është bërë rrjeti i amortizuar i shpërndarjes, i cili pëson dëmtime sa herë që ka një ndryshim të lehtë të kushteve atmosferike.
Banorët dhe bizneset e zonës thonë se mungesa e energjisë elektrike është bërë një problem i përsëritur, duke sjellë vështirësi të mëdha për jetesën e përditshme dhe veçanërisht për aktivitetin turistik, që në këtë periudhë ka fluks të lartë vizitorësh.
Ata kërkojnë ndërhyrje urgjente nga institucionet përgjegjëse, pasi situata e përsëritur e ikjes së dritave dëmton jo vetëm ekonominë lokale, por edhe imazhin turistik të këtyre destinacioneve të njohura malore.
