Sekretari i Përgjithshëm i Partisë Demokratike, Flamur Noka, ka reaguar lidhur me procesin zgjedhor të 11 majit, duke e quajtur atë një farsë të narko-regjimit. Në një deklaratë për mediat nga Postriba, Noka theksoi se opozita nuk do ta njohë këtë proces dhe do të vijojë betejën deri në garantimin e zgjedhjeve të lira në Shqipëri.
Ai akuzoi kryeministrin Edi Rama për qeverisje me krimin dhe për një situatë që e ka vendosur vendin në një gjendje të paprecedentë në Evropë.
“11 maji nuk ishin zgjedhje, por farsë. Nuk mund të pranojmë farsën e narko-regjimit. Do jemi në betejë çdo ditë deri sa Shqipëria të ketë zgjedhje të lira. Nuk do e njohim 11 majin,” deklaroi Noka, duke shtuar se opozita do të luajë rolin e saj përballë kësaj situate.
Sipas tij, beteja do të zhvillohet kudo, si në parlament ashtu edhe në çdo front tjetër politik e qytetar. “Është antikombëtare të merresh me opozitën, ndërkohë që narkosi po qeveris me terror,” u shpreh ai.
Noka akuzoi kryeministrin Edi Rama se po qeveris në bashkëpunim me krimin, duke theksuar: “Sot krimi është më i fortë se shteti. Beteja jonë është kundër krimit. Nuk ka vend në Europë që është në këtë gjendje që është Shqipëria.”
