Qeveria Rama e ka gati projektligjin për “Menaxhimin e Integruar të Mbetjeve”, i hartuar pas një pune 2-vjeçare dhe që pritet të marrë miratimin nga Këshilli i Ministrave javën që vjen. Ky projektligj parashikon ngritjen e një Operatori Kombëtar për Trajtimin e Mbetjeve, proces që tashmë nuk do të jetë më në dorë të pushtet vendor, por Bashkitë do jenë ‘klientë’. Detajet u prezantuan nga kryeministri Edi Rama, i cili theksoi se ky është kapitulli më sfidues në rrugën drejt BE-së.
Edi Rama, kryeministër i Shqipërisë
“Kemi parashikuar krijimin e Operatorit Kombëtar të Trajtimit të Mbetjeve. Një agjenci e re e cila do të jetë në dispozicion të të gjithë republikës, të pushtetit vendor, qytetarëve, të këtij misioni për në BE, duke përqendruar të gjithë procesin e trajtimit të mbetjeve. Nuk do të jetë më proces i administruar nga bashkitë, por nga ky operator kombëtar në bashkëpunim me të gjitha hallkat e tjera të qeverisjes dhe në raport me te cilin, bashkitë do të jenë klientë, njësoj siç janë në operatorët e tjerë”, tha Rama.
Projektligji parashikon ashpërsimin e sanksioneve për ndotësit, tha ministrja Mirela Kumbaro, e cila zbuloi se krahas mbetjeve gati është edhe projektligji për përgjegjësinë e zgjeruar të prodhuesit. Përmes këtij projektligji, qeveria do të detyrojë çdo biznes që të gjurmojë çdo mbetje që gjenerohet nga aktiviteti i tyre.
Edi Rama, kryeministër i Shqipërisë
“Jo vetëm bashkitë, jo vetëm institucionet publike, bizneset nga ato që prodhojnë mallra, që importojnë, të kenë detyrimin ligjor për të ndjekur gjurmuar çdo mbetje që gjenerohet nga aktiviteti i tyre industrial, i shërbimit apo prodhimit”, tha Kumbaro.
Kreu i qeverisë paralajmëron masa edhe për ‘varrezat’ e makinave, duke thënë se jemi i vetmi vend në Europë që i ka të ligjëruara me vullnetin e Maliqit.
Edi Rama, kryeministër i Shqipërisë
“Jemi besoj i vetmi vend në Evropë që varrezat e makinave i kemi të ligjëruara pa ligj, por me vullnetin e Maliqit në territor si fakte të kryera. Ky do të jetë një operacion që sapo ka nisur dhe do të vazhdojë për shkuljen e të gjithë këtyrë varrezave dhe jemi vend që s’ka akoma detyrim për prodhuesit, shpërndarësit e importuesit me këtë që thashë, për trajtimin dhe çfarë ndodh me gjithë këto materiale kur kryejnë misionin e tyre si ambalazh, pajisje elektrike apo si automjete. Për këtë kemi një ligj që do të kalojë në kuvend brenda këtij viti.”, tha Rama.
