Presidenti i FIFA-s, Gianni Infantino i ka dërguar një letër Presidentit të FSHF-së, Armand Duka, ku shpreh ngushëllimet për ndarjen nga jeta të ish-futbollistit dhe ish-trajnerit të njohur shqiptar, Sabah Bizi.
Në mesazhin e tij, Presidenti Infantino thekson se fjalët janë të pamjaftueshme për të shprehur trishtimin për këtë humbje, teksa shton se trashëgimia dhe kontributi i Bizit brenda dhe jashtë fushës së futbollit nuk do të harrohet.
Më poshtë edhe letra e plotë e Presidentit të FIFA-s drejtuar Presidentit Duka për të nderuar Sabah Bizin.
Në përkujtim të Sabah Bizit
I dashur President,
Dëshiroj të shpreh ngushëllimet më të sinqerta dhe më të thella për ndarjen nga jeta të ish-lojtarit të kombëtares, Sabah Bizi. Fjalët duket se janë të pamjaftueshme për të shprehur trishtimin që ndiejmë për këtë humbje.
Gjatë karrierës së tij ndërkombëtare, Sabah Bizi ka luajtur 15 ndeshje me kombëtaren e tij. Në nivel klubesh, ai do të kujtohet për karrierën e tij të gjatë me KF Vllaznia, ku fitoi tre tituj kampion, si dhe për kohën e tij me KF Partizani. Pas tërheqjes nga futbolli aktiv, ai vazhdoi të angazhohej me KF Vllaznia në pozicione të ndryshme.
Një legjendë e futbollit shqiptar dhe një ikonë e KF Vllaznia, trashëgimia dhe rrugëtimi i tij, si brenda dhe jashtë fushës së lojës, nuk do të harrohen, dhe ai do të na mungojë shumë.
Në emër të komunitetit ndërkombëtar të futbollit, dëshiroj të shpreh ngushëllimet më të thella për Federatën Shqiptare të Futbollit dhe për familjen, miqtë dhe të dashurit e Sabah Bizit. Mendimet tona janë me të gjithë ju.
Shpresojmë që këto kujtime dhe fjalët tona mbështetëse të sjellin pak paqe dhe ngushëllim në këtë kohë të vështirë.
Sinqerisht,
Gianni Infantino
