Rreth një vit pas përfundimit të investimit për ujësjellësin në njësinë administrative Postribë të Bashkisë Shkodër, banorët e zonës vijojnë të përballen me mungesën e ujit të pijshëm. Për këtë arsye, ata kanë dalë në protestë, duke e cilësuar investimin si të dështuar dhe pa asnjë vlerë reale. Sipas banorëve, investimi është kryer vetëm për të “mbyllur gojën” e komunitetit për shkak të veprimtarisë së një guroreje në zonë, e cila sipas tyre, është burimi kryesor i ndotjes dhe mungesës së ujit.
Një nga protestuesit i drejtoi një mesazh të drejtpërdrejtë SPAK-ut dhe qeverisë, duke kërkuar nga drejtuesi i këtij institucioni, Altin Dumani, që të mos mbajë të fshehura dosjet që lidhen me këtë çështje.
Banorët shprehen se problematika e ujit të pijshëm zgjat prej më shumë se 8 vitesh dhe lidhet ngushtë me aktivitetin e gurores. Megjithëse janë zhvilluar procese gjyqësore lidhur me këtë çështje, deri më tani nuk është arritur asnjë zgjidhje konkrete.
