Perfaqesuesit politik dhe ato te botes se sportit kane shprehur mesazhet e tyre te ngushellimit per ndarjen nga jeta te legjendes se futbollit shqiptar, Sabah Bizi.
Agron Çela:
Me dhimbje të thellë mora lajmin për ndarjen nga jeta të legjendës së futbollit, Sabah Bizi. Ai ishte një figurë e paçmuar për sportin shqiptar, një ikonë që frymëzoi dhe ndikoi në shumë breza. Me talentin, përkushtimin dhe pasionin e tij, Sabah Bizi do të kujtohet gjithmonë si një ndër emrat më të mëdhenj të futbollit të shqiptarëve.
Ngushëllimet e mia më të sinqerta për familjen dhe të gjithë ata që e njohën dhe e donin. Sabah Bizi do të jetojë përgjithmonë në kujtimet tona si një njeri që dha gjithçka për futbollin dhe Vllazninë e tij të zemrës.
Edmond Ndou:
Një lajm i trishtë për Shkodrën dhe mbarë Shqipërinë, ai i ndarjes nga jeta të legjendës së futbollit shqiptar, “Nderit të Kombit” Sabah Bizi. Një emër që do të mbetet gjithmonë i paharruar në historinë e sportit shqiptar. Ai ishte një figurë e shquar, jo vetëm për aftësitë e tij në fushë, por edhe për karakterin dhe pasionin që shprehte për futbollin dhe veçanërisht për skuarën e zemrës, Vllazninë! Bizi mbetet një nga yjet e sportit shqiptar që do të shërbejë si frymëzim për brezat. Ngushëllime familjes, miqve dhe të gjithë botës së sportit. U prehsh në paqe, legjendë!
Armando Duka:
Me hidhërim të thellë morëm lajmin për ndarjen nga jeta të legjendës së futbollit shqiptar, Sabah Bizi, një emër i madh që la gjurmë të pashlyeshme në historinë e sportit tonë.
Si një ndër ikonat e Vllaznisë dhe Kombëtares shqiptare, ai debutoi në futbollin shqiptar në moshë të re dhe u bë simbol i talentit dhe përkushtimit. Përballja e tij me Franz Beckenbauer në ndeshjen historike kundër Gjermanisë në vitin 1967, ndonëse ai ishte vetëm 19 vjeç, është dëshmi e madhështisë së tij në fushën e blertë.
Gjatë karrierës së tij të shkëlqyer, Sabah Bizi fitoi tituj kampionë dhe kupa, duke i dhënë futbollit shqiptar momente krenarie dhe emocionuese. Edhe pas lënies së futbollit aktiv, ai i qëndroi pranë sportit të zemrës, duke dhënë një kontribut të jashtëzakonshëm në zhvillimin e brezave të rinj si trajner dhe drejtues.
Në emër të Federatës Shqiptare të Futbollit dhe të gjithë komunitetit të futbollit, i shpreh ngushëllimet më të sinqerta familjes Bizi, të afërmve dhe miqve të tij. Futbolli shqiptar humbi një legjendë të vërtetë, por trashëgimia e tij do të mbetet përjetë frymëzim për brezat e ardhshëm.
Pusho në paqe legjendë!
Benet Beci:
Lamtumirë, Mjeshtër!
Lajmi për ndarjen nga jeta të legjendës së futbollit shkodran dhe atij shqiptar, Sabah Bizi, është një ditë e trishtë jo vetëm për botën e sportit, por për të gjithë Shkodrën.
Një emër që i dhuroi Shkodrës shumë trofe dhe lavdi. Emocionet që solli për tifozët e zjarrtë të Vllaznisë do të mbeten përgjithmonë në kujtesën e Shkodrës dhe të gjithë Shqipërisë.
Bardh Spahia:
Shkodra dhe Shqipëria humbi një yll të sportit shqiptar, mjeshtrin Sabah Bizi. Ai ishte një ikonë e sportit tonë kombëtar, një emër që na dhuroi krenari me talentin dhe përkushtimin e tij në fushë. Trashëgimia e tij në futboll do të mbetet frymëzim për brezat e rinj dhe një shembull i shkëlqyer i asaj që mund të arrihet me punë, disiplinë dhe dashuri për vendin. Ngushëllimet e mia më të sinqerta familjes Bizi, Nefizes, Brikenos, Brinesës, miqve dhe komunitetit sportiv shqiptar. Pushofsh në paqe legjenda Bizi!
