Një zjarr i rëndë ka shpërthyer në tregun e rrobave të përdorura në Qafë Hardhi, pasditën e kësaj të premte. Autoritetet lokale kanë kërkuar ndihmë urgjente nga Emergjencat Civile, ndërsa zjarrfikëset janë angazhuar në zjarrin e fuqishëm. Mjete të ndryshme janë dërguar nga Malësia e Madhe, Lezha, Ulqini dhe Tivari, për të ndihmuar në frenimin e flakëve.
Reagimi ka qenë i shpejtë nga Policia e Shtetit dhe Forcat e Ndërhyrjes së Shpejtë, duke siguruar mbështetje për ekipet zjarrfikëse dhe për personelin e emergjencave civile.
Për fat të mirë, raportohet se dëmet janë vetëm materiale. Aktualisht, në terren janë të angazhuar 21 mjete zjarrfikëse nga reparti i Shkodrës dhe zonat e tjera, së bashku me 110 efektivë zjarrfikës. Përveç kësaj, janë mobilizuar 30 efektivë të Policisë Shkodër, 20 të Forcës së Ndërhyrjes së Shpejtë dhe 3 autoambulanca me personel nga Spitali i Shkodrës. Në përpjekje për të ndihmuar në zjarr, janë përfshirë edhe 110 punonjës të Bashkisë Shkodër dhe 30 efektivë të Repartit Ushtarak Vau Dejës.
Falënderojmë të gjithë ekipet e angazhuara për përpjekjet e tyre të palodhshme për të frenuar zjarrin dhe për të mbrojtur komunitetin tonë. Solidariteti dhe bashkëpunimi i treguar gjatë kësaj ngjarjeje tregojnë forcën tonë si një bashkësi në momente të vështira. Faleminderit për përkushtimin dhe shërbesën tuaj në mbrojtje të qytetarëve dhe pronave të tyre.
