Një makinë ku brenda saj janë gjetur dy kallashnikov është gjetur e djegur në zonën e Manzës. Dyshohet se kjo makinë i përket autorëve të masakrës së djeshme në zonën e “Dob Boskos” në Tiranë, ku mbeti e vrarë një grua dhe të paktën 5 persona të tjerë u plagosën. Armët dhe makina po këqyren nga policia shkencore për të zbuluar ndonjë gjurmë. Kujtojmë se në ngjarjen e djeshme humbi jetën banakierja e lokalit në pronësi të Fatjon Muratit një person me precedentë të theksuar kriminalë. Ndërsa të plagosurit që mësohet se janë jashtë rrezikut për jetën janë shtetasit: Sahit Murati (xhaxhai i Fatjon Muratit), Astrit Meraj, Emanuel Sala, Ermir Bejuku, Genc Shohalli.
Policia Durrës/Informacion paraprak
Rreth orës 08:00, në vendin e quajtur “Ura e Sulë Meres”, në territorin e fshatit Likmetaj, shërbimet e Policisë të Stacionit të Policisë Manzë, duke ushtruar kontroll në territor, për kapjen e autorëve të ngjarjes së ndodhur mbrëmjen e djeshme, në rrugën “Ananstas Shundi”, Don Bosko, Tiranë, kanë konstatuar të djegur plotësisht, një automjet tip “BMW”, brenda të cilit janë gjetur 3 armë zjarri automatike.
Nga hetimet paraprake dyshohet se ky automjet është përdorur për kryerjen e ngjarjes së mbrëmshme, në rrugën “Ananstas Shundi”, Don Bosko, Tiranë.
Grupi i posaçëm hetimor i ngritur në Drejtorinë Vendore të Policisë Tiranë, me qëllim zbardhjen e kësaj ngjarjeje, identifikimin dhe kapjen e autorëve, vijon punën në bashkëpunim me specialistët e Institutit të Policisë Shkencore, për të dokumentuar lidhjen e automjetit të djegur, me ngjarjen e ndodhur mbrëmjen e djeshme, në Tiranë.
