Një shpërthim ka tronditur qytetin e Lezhës në orët e para të mëngjesit të datës 26 shkurt 2025, ku një sasi lënde plasëse është vendosur në zyrën noteriale të noterit Fran Gjoni, e cila ndodhet pranë sheshit “Gjergj Kastrioti” në qendër të qytetit. Nga shpërthimi janë shkaktuar dëme të vogla materiale, por fatmirësisht nuk ka pasur të lënduar.
Sipas pamjeve të kamerave të sigurisë, dy persona të pamaskuar kanë vendosur lëndën plasëse dhe janë larguar menjëherë pas shpërthimit. Policia ka nisur hetimet për të identifikuar autorët e shpërthimit dhe po punon për zbardhjen e ngjarjes.
Fran Gjoni, noteri i goditur, ka deklaruar se nuk ka pasur konflikte apo probleme me ndonjë person. Ai është vëllai i ish-gjyqtarit Gjin Gjoni, i cili është bërë pjesë e politikës si kryetar i Partisë Demokratike në Lezhë dhe kandidati për primare për deputet. Gjin Gjoni u dorëhoq nga posti i gjyqtarit për t’i shpëtuar procesit të vettingut dhe është njohur për rolin e tij në shpëtimin e Sali Berishës nga gjyqi për kryengritjen e armatosur të vitit 1998.
