Policia Rrugore e Lezhës ka gjobitur 3 drejtues mjetesh pasi kryen parakalime të gabuara në rrugë. Policia ka reaguar menjëherë pas publikimit në rrjete sociale të tri videove ku shfaqeshin automjete që kryenin parakalime të rrezikshme në segmentet rrugore Milot-Lezhë dhe Balldren-Lezhë.
Policia e Shtetit bën të ditur se, shërbimet policore kanë identifikuar drejtuesit e mjeteve dhe kanë marrë masat përkatëse administrative.
Sipas Policisë, secili drejtues u ndëshkua me gjobë prej 12 000 lekësh. Njërit prej tyre iu zbritën 10 pikë nga leja e drejtimit.
Njoftimi i policise:
🚨 Kryen parakalime të rrezikshme, ndëshkohen me masa administrative 3 drejtues automjetesh
Pas publikimit të tre videove në rrjete sociale, ku shfaqeshin automjete që kryenin parakalime të rrezikshme në segmentet rrugore “Milot-Lezhë” dhe “Balldre-Lezhë”, shërbimet e Policisë Rrugore të Lezhës, kanë kryer menjëherë veprimet për identifikimin e drejtuesve të tyre.
Në zbatim të neneve 141 dhe 127 të Kodit Rrugor, secili drejtues u ndëshkua me masën administrative 12 000 lekë, ndërsa njërit prej tyre iu zbritën edhe 10 pikë nga leja e drejtimit.
Policia Rrugore e Lezhës falënderon qytetarët dhe median për kontributin në evidentimin e shkeljeve të rregullave të qarkullimit rrugor dhe i fton që të vijojnë të denoncojnë raste të tilla, pasi reagimi i Policisë do të jetë i menjëhershëm, i paanshëm dhe konform ligjit. ✅
