Kryeministri Edi Rama ka prezantuar një nismë të re digjitale në shërbim të kontrollit dhe administrimit të territorit në vend. Bëhet fjalë për Kryeinspektoriatin Digjital të Territorit, një strukturë e re që synon të sjellë një revolucion në mënyrën se si monitorohen ndërtimet, zbatohen ligjet dhe mbrohet pasuria natyrore në Shqipëri. Përmes teknologjisë së avancuar dhe mbledhjes së të dhënave në kohë reale, ky inspektorat do të mundësojë një ndërhyrje më efikase dhe të drejtë nga institucionet përkatëse, duke parandaluar shkeljet dhe lehtësuar proceset administrative.
STATUSI I RAMES:
Ju prezantoj me një tjetër inovacion të qeverisjes: Kryeinspektoriatin Digjital të Territorit.
Videoja është një fragment i shkurtër i informacionit që ky Kryeinspektoriat po mbledh nëpër Shqipëri, për të filluar punën për zbatimin e masave të reja ligjore të kontrollit të territorit. Ky Kryeinspektoriat do të mbulojë hap pas hapi të gjithë gamën e aktiviteteve shoqërore e shtetërore në territor, nga kontrolli i ndërtimeve tek taksat e tarifat vendore, nga prodhimi bujqësor tek mbrojtja e pyjeve dhe lumenjve, duke e bërë punën e strukturave përkatëse më të lehtë, si edhe duke i bërë zullumet e llojllojshme shumë më të vështira.
