Konferenca Ipeshkvnore Shqiptare ka reaguar pas ndarjes nga jeta te monsinjor Simon Kullit, Ipeshkev i Sapes. Ne reagimin e saj ajo thekson angazhimin e tij ne keto 9 vite ne sherbim te kesaj dioqeze si Ipeshkev, ndersa i perkiste brezit te pare te meshtareve te shuguruar pas komunizmit.
Statusi i Konferences Ipeshkvnore:
Ndërron jetë Ipeshkvi i Sapës, Imzot Simon Kulli!
Mëngjesin e sotëm, në mënyrë të papritur, pas një sulmi kardiak, ndërroi jetë Ipeshkvi i Sapës, Imzot Simon Kulli. Ai i përkiste brezit të parë të meshtarëve të shuguruar pas komunizmit dhe u emërua Ipeshkëv i Sapës nga Papa Françesku në vitin 2017. I lutemi Zotit për prindërit, familjen dhe mbarë Dioqezën e Sapës në këtë moment kaq të vështirë dhe pikëllues. Falënderojmë Zotin për të gjitha të mirat që, si shërbëtor i përvujtë, kreu në vreshtin e tij.
Për detaje të tjera do të njoftojmë në vazhdim.
Edhe Arqipeshkevi i Shkodres imzot Giovanni Peragine ka reaguar per kete humbje te rende.
Statusi i Arqipeshkevise Metropolitane Shkoder – Pult
Me dhimbje të thellë morëm lajmin për kalimin në amshim të Ipeshkvit të Dioqezës së Sapës, Imzot Simon Kulli.
Në këtë ditë zie për Kishën në Shqipëri, lutjet tona shkojnë për shpirtin e tij fisnik dhe për gjithë komunitetin që ai shërbeu me zemër të përkushtuar.
Imzot Simon Kulli lindi më 14.02.1973 në Pistull të Vaut të Dejës. U shugurua meshtar në vitin 2000 dhe, pas shumë viteve shërbimi baritor, u emërua Ipeshkëv në vitin 2017. Ai u dallua për thjeshtësinë e tij, afërsinë me popullin, kujdesin për të varfrit, nismat baritore dhe përkushtimin e palodhur ndaj rinisë dhe familjes.
Gjatë viteve të shërbimit të tij, Imzot Kulli u bë një zë i qartë i shpresës, i dialogut dhe i dashurisë së Krishtit, duke lënë gjurmë të pashlyeshme në zemrat e shumë besimtarëve.
Zoti i dhuroftë paqen e amshuar !
