Edi Martini te Vllaznia e nisi sezonin e ri në Superiore me fitore, por shkodrani personalisht u ndëshkua me karton të kuq në sfidën ndaj Egnatias. Një karton që i “kushton” shkodranit, i cili nuk do të mund të drejtojë skuadrën në ndeshjen ndaj Dinamos. Përballje kjo e parashikuar të zhvillohet ditën e dielë në orën 20:00 në “Elbasan Arena”. Por jo vetëm kaq, kuqeblutë mbeten pa trajner edhe ndaj Partizanit. Kjo pasi Komisioni i Disiplinës dhe Etikës ka pezulluar me 2 ndeshje trajnerin shkodran. Kështu në përballjen që do të luajnë me “Demat” nuk do të mund të drejtojë ekipin, teksa do ta ndjekë ndeshjen nga tribuna. Me Partizanin është parashikuar të luhet më 13 shtator në “Loro Boriçi”, duel i vlefshëm për javën e 3-të.
VENDIMI I DISIPLINES:
- KF Vllaznia, në bazë të nenit 6/1/a të KDE, paralajmërohet se në rast të përsëritjes së sjelljes së gabuar të spektatorëve, do të jetë subjekt i masave disiplinore që parashikon Kodi i Disiplinës dhe Etikës dhe rregulloret e FSHF.
- Zyrtari i FK Vllaznia, Edi Martini, për protestë ndaj vendimeve të zyrtarëve të ndeshjes, në bazë të nenit 14/1/c të KDE, dënohet me 2 (dy) ndeshje pezullim nga veprimtaritë.
Kundër vendimit lejohet ankim brenda 3 (tre) ditëve përpara Komisionit të Apelit.
