Kryeministri Edi Rama ka qenë pjesë e një takimi të zhvilluar me përfaqësues të punëdhënësve, punëmarrësve dhe shoqërisë civile për të forcuar dialogun social dhe bashkëpunimin mes Shqipërisë dhe BE-së.
Rama gjatë fjalës së tij tha se ky i sotmi është një moment historik për Shqipërinë, pasi sipas tij, BE dhe Brukseli janë më gati se kurrë për ta marrë vendin tonë brenda.
Po ashtu, Rama tha se Shqipëria duhet të përfitojë nga ky shans dhe të bëjë të gjitha përpjekjet për të qenë brenda Unionit, përpara se dera e BE të mbyllet.
“Tani po jetojmë në një moment ku Brukseli dhe BE na kanë surprizuar me vullnetin e tyre të fortë dhe gatishmërinë e tyre për të na marrë brenda. Kur kujtoj që prej herës së parë kur e nisëm këtë rrugëtim të gjatë më shumë se 30 vite më parë, është hera e parë që kujtoj që yjet tona janë në një linjë me yjet e Bashkimit Europian.
Jo vetëm sa i takon të ardhmes e perspektivës, por edhe sa i takon së tashmes. BE ka qenë shumë i kujdesshëm të thotë se vendi ynë një ditë do të jetë në Europë, por nuk e kemi ndjerë kurrë këtë që po ndiejmë së fundmi, gatishmërinë për ta bërë realitet. Kjo lidhet jo vetëm me punën tonë të mirë, por edhe me situatën e përgjithshme në BE dhe më gjerë. Dera është e hapur.
Duhet të përfitojmë nga ky shans dhe të bëjmë maksimumin për të qenë brenda, kur kjo derë të mbyllet sërish. Ne e dimë sesi funskionon. Kështjella hap dyert dhe pastaj mbyll dyert. Ka nga ata që janë më të shpejtë, që kanë hyrë dhe e kanë gjetur brenda veten kur dera është mbyllur dhe ka nga ata që e kanë gjetur veten jashtë”, tha Rama.
