Përplasje të ashpra në Kuvend mes deputetëve të opozitës dhe Gardës. Kjo e fundit, për herë të parë ka rrethuar Kuvendin me gardh metalik me qëllim për të penguar futjen e 23 deputetëve të përjashtuar të opozitës.
Deputetët e përjashtuar mbetën jashtë sallës, ndërkohë që të tjerët krijuan kaos dhe tension brenda në seancë plenare. Deputetja Elda Hoti hodhi një material të lëngshëm drejt deputetëve socialistë, ndërsa Albana Vokshi e të tjerë nuk lejuan që KLSH të bënte raportimin në sallë.
Në skenarin e kaosit u përfshi edhe deputeti i PDIU, Gëzim Ademaj i cili mblodhi karriget pirg në Foltore. Spiropali përjashtoi dy deputetët, Elda Hoti dhe Petrit Doda.
Në Kuvend janë rritur edhe masat e sigurisë. Forca të shumta policie kanë zbarkuar në Kuvend, por edhe zjarrfikës. Ndërkohë, deputetët e PS kanë shkuar në Kuvend rreth 1 orë para nisjes së seancës plenare.
Komisioni i Etikës përjashtoi 23 deputetë pas djegies së karrigeve dhe kaosit, me 10-60 ditë ndëshkim administrativ, kurse 4 të tjerë i gjobiti në total mbi 7 mln lekë të vjetra për dëmet e shkaktuara brenda dhe jashtë sallës.
Për shkak të tensioneve në Kuvend seanca parlamentare do të shtyhet 10 minuta.
Kryetarja e Kuvendit Elisa Spiropali është shprehur se do të verifikohet se çfarë lënde hodhi Elda Hoti.
