Hilmi Lakti do të jetë drejtori i ri i filialit të postës në Shkodër, duke zëvëndësuar në këtë detyrë Mirela Dodaj. Ka qënë vetë kjo e fundit që ka bërë publik lajmin, duke shkruar në rrjetin e saj social se pas afro 3 vitesh në krye të këtij institucioni, largohet për ti lënë vendin bashkëkryetarit të PS, Hilmi Lakti që më herët ka mbajtur postin e kryetarit të qarkut Shkodër.
Statusi i plotë i Mirela Dodaj:
Të nderuar kolegë e të dashur qytetarë të Qarkut Shkodër!
Dua të ndaj me ju lajmin që nga sot e tutje rrugëtimi im si Drejtoreshë e Filialit të Postës Shqiptare, Qarku Shkodër përfundon ditën e sotme. Nuk mund të mos ndaj me ju emocionet e bukura, krenarinë e privilegjin që kam patur për të drejtuar institucionin më të prekshëm nga qytetarët. Ka qenë një rrugëtim i bukur dhe shumë sfidues, me ditë të lumtura e me më pak të tilla, por jam e sigurt dhe e them me plot gojë që misionin tonë në këtë institucion e kemi përmbushur me sukses, kjo falë mbështetjes suaj dhe punës së palodhur të stafit të Filialit e kolegët e Drejtorisë së Përgjithshme, për të cilët kam një falenderim shumë të madh! Kur e morra drejtimin e këtij institucioni në vitin 2019 kisha shumë synime e qëllime për të reformuar shërbimin, për të standardizuar proceset e punës dhe për ta bërë institucionin të aksesueshëm për të gjithë, pa dallime, larg fenomeneve negative me të cilat asociohej aso kohe. Me mbylljen e këtij cikli jam e lumtur që ia dolëm dhe falenderoj të gjithë ata që besuan tek unë! Dua t’i uroj shumë suksese Z. Hilmi Lakti i cili merr stafetën e drejtimit të këtij institucioni dhe jam e bindur që do punojë fort për realizimin dhe përmbushjen e detyrave! Shihemi në sfidat dhe rrugëtimet e reja!
FALEMINDERIT ME ZEMËR!
