Nikol Çabeli me këngën “Coco im” u shpall fituese e edicionit të 61-të të festivalit Mbarëkombëtar të këngës për fëmijë në Shkodër.
Për 3 netë radhazi teatri “Migjeni” i Shkodrës u kthye në skenën e madhe të fëmijëve nga të gjitha trevat shqipfolëse. Mes 20 interpretimëve të zërave më të bukur fëminor nga mosha 5 deri në 11 vjeç, Nikol Çabeli, 11 vjeçarja nga Gjirokastra që e kishte pjesmarrjen e parë të sajën në këtë festival, mori pikët maksimale nga juria që ishin vetë fëmijët.
Për drejtorin e festivalit Ermir Zoga, rrugëtimi mbi 6 dekada i kësaj feste të madhe të fëmijëve, është dëshmia më e bukur se Shkodra do të vazhdojë ta ruajë këtë traditë.
Eriona Rushiti nga ky festival doli me 2 çmime, si autore e tekstit dhe muzikës së këngës fituese dhe e çmimit “Kujtim Alija”.
Me cmim të dytë u vlerësua kënga “Mama” nga Emili Dervishi dhe çmim të tretë kënga “Superstar” Gedis Germani.
