Si rrallëherë 17 vitet e fundit, Cristiano Ronaldo nuk ishte protagonist në mbrëmjen e ndarjes së çmimeve të Topit të Artë. Vendi i 20 në 30 të parët është renditja më e ulët e CR7 në këtë klasifikim që prej vitit 2005 kur u shfaq për herë të parë në listën prestigjoze por pavarësisht këtij fakti, luzitani mbetet futbollisti më influent në planet.
Sezonin e kaluar, Ronaldo shënoi 24 gola në 38 ndeshje ndërsa këtë sezon vetëm 2, por nëse kurba e fituesit të 5 Topave të Artë është në rënie në fushën e lojës, ajo në fushën e marketingut është në rritje.
Ai është shpallur atlteti më i marketuar në planet duke lënë pas edhe emra të mëdhenj si Lionel Messi, Serena Williams, Lewis Hamilton e LeBron James. Momentalisht, ai është ylli më i madh në Instagram me 489 milionë ndjekës, ndërsa kontratat e tij me kompanitë Nike, Herbalife, Clear dhe LiveScore cilësohen si ndër më të shtrenjtat në tregun e sportit sot.
Lista e atletëve më influentë në botën e marketingut është hartuar për të 13-tin vit rresht nga kompania “SportsPro” dhe në llogaritje nuk përfshihen vetëm mediat virtuale apo kontratat me sponsorët por edhe impakti social që atletët kanë, përfshirë edhe angazhimin e tyre në bëmirësi. Ronaldo ka marrë 91.21 pikë të mundshme nga 100, ndjekur nga Serena Williams dhe Lewis Hamilton në vendin e tretë.
