Ish-kreu i Bashkisë Shkodër, Bardh Spahia, në një prononcim për mediat jashtë dyerve të SPAK, seancë kjo e cila zhvillohet pas kalimit të dosjes hetimore ndaj Spahisë, për akuzën e moszbatimit të vendimit të gjykatës, u shpreh se mendimet e tij shkojnë për ata katër të rinjtë që humbën jetën në qytetin e Shkodrës, duke kërkuar mbrojtjen e votës së lirë, 34 vjet më parë. Ai shtoi se mendimet e tij shkojnë sot për familjarët e 2 prillit, për familjarët e 100 të plagosurve dhe për tërë popullin e Shkodrës, duke përkujtuar një prej datave më të rëndësishme për qytetin.
Spahia nënvizoi se, sot për fat të keq, shqiptarët po kërkojnë edhe një herë mbrojtjen e votës së lirë dhe shkëputjen e krimit nga shteti, që sipas tij ka kapur çdo zyrë të tij. Ish-deputeti theksoi se, çështja e tij që po shqyrtohet nga Gjykata është një formalitet, dhe se ai ka kërkuar një gjykim të drejtë, duke hedhur poshtë mundësinë e gjykimit të shkurtuar, pasi e konsideron këtë një padi të përgatitur nga zyrat e Partisë Socialiste. Ai bëri thirrje për drejtësi dhe shprehu dyshimet e tij se ky proces është i lidhur me një person të dënuar për vjedhje dhe korrupsion, i cili, sipas tij, po përdoret për të ngritur padi ndaj tij.
Bardh Spahia: “Mendimet e mia shkojnë për ata katër të rinjtë që humbën jetën në qytetin e Shkodrës, duke kërkuar mbrojtjen e votës së lirë, 34 vjet më parë, për familjarët e 2 prillit, për familjarët e 100 të plagosurve dhe për tërë popullin e Shkodrës, duke përkujtuar një prej datave më të rëndësishme për popullin shkodran. Sot nuk munda të jem prezent për ta përkujtuar në Shkodër, edhe pse isha një ish-pjesëmarrës në atë protestë, por mu desh të isha në SPAK. Për fat të keq, edhe një herë shqiptarët kërkojnë mbrojtjen e votës së tyre dhe shkëputjen e krimit nga shteti, i cili ka kapur çdo zyrë të tij. Po atyre kriminelëve të 2 prillit, sot drejtojnë qeverinë. Sot shqiptarët po kërkojnë mbrojtjen e votës së lirë, mbrojtjen e vetes së tyre dhe shkëputjen e krimit nga shteti që sot ka kapur gjithçka. Kjo e sotmja ishte një formalitet i Gjykatës për ta dërguar çështjen time në gjykim. Sigurisht, unë nuk pranova gjykimin e shkurtuar, por kërkova gjykim normal, i bindur se kjo është një padi e përgatitur në zyrat e PS-së, jo vetëm në Shkodër, por edhe në Tiranë, të cilët përdorin një person të dënuar për vjedhje e korrupsion, ndaj të cilit kontrolli i lartë i shtetit ka bërë një lidhje dhe ka kërkuar shkarkimin e tij për abuzime. Sot, ky person përdoret për të ngritur padi ndaj meje”.
