Çeshtja e pronësisë vijon të mbetet një plagë për shoqërinë shqiptare. E tillë është edhe beteja ligjore dhe përplasjet që kanë prej afro 20 vitesh rreth 31 familje në lagjen “Skenderbeg” të Shkodrës me shtetasin Gjon Shkambi. Ai pretendon pronësinë e banesave ku shteti i vendosi këto familje në fillimet e demokracisë dhe konfliktet mes tyre kanë qënë të vazhdueshme, i fundit një natë më parë kur ju drejtuan edhe policisë Shkodër.
Këto familje u vendosën në vitin 1992 në godinën e ish rezervave të ndërtimit me një vendim të Bashkisë Shkodër të asaj kohe. Para 3 vitesh banorët kanë patur një tjetër përplasje me Përmbarimin në Shkodër të cilët tentuan për t’i nxjerrë jashtë, por rezistuan me forcë duke thënë se edhe vendimi i Përmbarimit ka rënë poshtë dhe nuk ka vlerë ligjore. Konflikti mes banorëve dhe shtetasit Gjon Shkambi që pretendon se është pronari i ligjshëm vijon ndërsa është e paqartë se cila do jetë zgjidhja përfundimtare. Fati i ketyre familjeve ka mbetur pezull dhe askush nuk di tu thotë se cfarë do të ndodh me pronën ku jetojnë.
