Komisioni Qendror i Zgjedhjeve hap thesin e lekëve për komisionerët që do të menaxhojnë votimet e 14 majit në 92 Komisione Zonale të Administrimit Zgjedhor në të gjithë vendin.
KQZ ka përcaktuar masën e shpërblimit sipas vështirësive të hasura në zgjedhjet e kaluara, ku për komisionerët që do të menaxhojnë më shumë se 80 qendra votimi shpërblimi financiar do të jetë më i madh.
Në projetvendimin për caktimin e masës së shpërblimit për anëtarët e Komisioneve Zgjedhore për zgjedhjet për Organet e Qeverisjes Vendore të datës 14 maj 2023, KQZ ka parashikuar që Kryetari dhe zëvendëskryetari i KZAZ-së, nga momenti i konstituimit deri në shpalljen e rezultatit përfundimtar të zgjedhjeve shpërblehet Në vlerën 65.000 lekë të reja, për KZAZ-të të cilat kanë në juridiksionin e tyre më pak se 50 qendra votimi;
Në vlerën 100.000 lekë të reja, për KZAZ-të të cilat kanë në juridiksionin e tyre 50 (pesëdhjetë) deri në 80 (tetëdhjetë) qendra votimi; dhe në vlerën 120.000 lekë të reja, për KZAZ-të të cilat kanë në juridiksionin e tyre më shumë se 80 qendra votimi.
Ndërkaq Sekretarët e KZAZ-ve me më pak se 50 qendra votimi, do të shpërblehet në vlerën 60.000 lekë të reja;
Në vlerën 95.000 lekë, për sekretarët e KZAZ-ve të cilat kanë në juridiksionin e tyre 50 deri në 80 qendra votimi. Dhe 118.000 lekë të reja do të marrin, sekretarët e KZAZ-ve me mbi 80 qendra votimi. Ndërsa Anëtarët e KZAZ-ve do të marrin 60.000 lekë të reja, nga momenti i konstituimit të saj deri në shpalljen e rezultatit përfundimtar të zgjedhjeve.
Ndërkaq Kryetari i Komisionit të Qendrës së Votimit (KQV) do të shpërblehet në vlerën 4.000 (dyzet mijë) lekë.
Anëtarët dhe Sekretarët e KQV-ve do përfitojnë 3.500 lekë të reja.
Anëtarët e Grupeve të Numërimit të Votave (GNV) do shpërblehen në vlerën 6.000 lekëve të reja.
Në dokumentin e saj KQZ sqaron se 16 KZAZ kanë më shumë se 80 QV; 34 KZAZ kanë 50 deri në 80 QV; dhe 42 KZAZ kanë më pak se 50 QV.
Po ashtu në mbledhjen e radhës KQZ pritet të miratojë dhe modelet e specifikimeve teknike edhe të disa materialeve zgjedhore.
Bëhet fjalë për vulat me kod sigurie për vulosjen e kutisë së votimit dhe kutisë së materialeve zgjedhore; për kutitë e votimit; për kutitë e materialeve zgjedhore; për lëndën e posaçme për timbrimin e zgjedhësve; për dhomën e fshehtë; si dhe për etiketën e sigurisë.
