Nga Bardh Spahia
REFORMA TERRITORIALE APO REFORMA MORALE?
Takimi i fundit në Shkodër për reformën territoriale nxori në dritë një të vërtetë të madhe që pushteti përpiqet ta fshehë me tabela, fasada, statistika dhe formula teknokratike. Qytetarët janë braktisur! Ndarja e vitit 2014 dështoi sepse i largoi shërbimet nga njerëzit, duke i lënë periferitë dhe fshatrat në harresë të plotë.
Por, tallja me kryeqendrën e Veriut, Shkodrën, shkon edhe më tej. Si mund të flitet për reformë territoriale administrative kur kjo qeveri, me një qasje hakmarrëse, ka bërë çmos për ta zhveshur Shkodrën nga pesha e saj administrative, historike dhe rajonale?
Drejtori të rëndësishme e historike, nga Arsimi tek Ujitja e Kullimi e deri te Arkivat, shërbimi informativ e gjykatat u transferuan pa asnjë logjikë nga Shkodra për t’u zhvendosur drejt Lezhës, duke detyruar qytetarët dhe specialistët shkodranë të udhëtojnë me kilometra të tëra për një shërbim bazë.
Nuk harrohet as deklarata fyese e kryeministrit pak ditë para zgjedhjeve lokale, i cili u tha shkodranëve troç se “po nuk votuat PS-në, nuk keni fonde”. Ky nuk është shtet i të drejtës por një organizatë e mbushur me kusarë që persekuton kë nuk e mbështet apo voton. Fondet publike janë taksat e qytetarëve, nuk janë as portofoli i kryeministrit dhe as sadaka partie për të blerë nënshtrimin e një qyteti që nuk thyhet.
Prandaj, përtej vijave në hartë, ka një të vërtetë edhe më ulëritëse. Ndryshimi real nuk vjen thjesht nga numri i bashkive, por nga njerëzit që ulen në karriget që drejtojnë bashkitë dhe zyrat e shtetit. Sot, më shumë se për harta të reja, qytetet tona kanë etje për ndershmëri.
Zyrtarë të korruptuar që bashkitë e postet drejtuese i shohin si biznese private dhe pronat publike si trashëgimi partiake apo familiare duhet të pastrohen nga shërbimi civil dhe të përballen me drejtësinë dhe sekuestrimin e pasurive të vëna pa djersë e poshtërsisht.
Kryebashkiakë dhe administratorë që vijnë në pushtet me vota të blera dhe me paratë e pista të krimit, të cilët detyrimisht punojnë për krimin dhe jo për qytetarin, nuk kanë vend në zyrat e shtetit.
Nëse në krye të një bashkie qëndron një njeri i pangopur, ajo do të prodhojë vetëm varfëri, braktisje dhe emigrim.
Qytetarët kanë nevojë për drejtues që e duan vendin e tyre, që kujdesen për çdo rrugicë, për çdo shkollë dhe për çdo familje në nevojë.
Ndryshimi i vërtetë fillon kur në zyrat e shtetit e postet publike të rikthehet dinjiteti, pastërtia morale dhe llogaridhënia.
Duhet të çrrënjosim modelin e pushtetarëve të emëruar nga bandat dhe të kthejmë modelin e shërbëtorëve të ndershëm të njerëzve.
Pushteti u përket qytetarëve, jo atyre që duan ta blejnë apo ta marrin peng!
