Prurjet e shumta dhe reshjet e rëna gjatë ditëve të fundit, nga lumenjtë dhe përrenjtë e territorit të qarkut të Shkodrës kanë bërë që i gjithë bregdeti i Velipojës të jetë i mbushur me mbetje plastike të cilat kanë krijuar një katastrofë mjedisore. Brezi rënor i bregdetit më të madh të Adriatikut, Velipojës i përngjan një landfilli mbetjesh plastike.
Kudo, shishe plastike, por edhe mbetje të tjera, të kthyera mbrapsh nga baticë-zbatica e detit. Situata është pak të thuhet alarmante. Por cuditërisht edhe pse ajo është e tillë prej ditësh të tëra, Bashkia Shkodër dhe autoritetet e tjera nuk kanë marrë asnjë masë për pastrimin e saj. Imazhi që po përcillet për turizmin është tejet i rëndë dhe paradoksalisht ata që kanë detyrimin të veprojnë, po bëjnë sehir. Ndotja nga Shqipëria ka vënë në alarm edhe Kroacinë, në bregdetin e së cilës po ashtu disa ditë më parë kanë mbërritur masivisht mbetje plastike, të identifikuara si shqiptare, përmes etiketave dhe simboleve, të cilat kanë pushtuar portin e vjetër të Dubrovnikut dhe plazhin Banje. Sipas mediave kroate, ekspertët dhe autoritetet lokale e vlerësojnë fenomenin si kronik dhe me rrezik të lartë për mjedisin detar, por edhe për imazhin turistik të qytetit, një ndër destinacionet kryesore në Adriatik.
